Telja ótal möguleika í Gufunesi

Vinnuhópur um framtíðarskipulag í Gufunesi leggur til opna hugmyndasamkeppni meðal fagaðila um svæðið.

Minnisblað vinnuhópsins var tekið fyrir í skipulagsráði í gær en fæst ekki afhent fyrr en borgarráð hefur afgreitt það í dag.

Í tilkynningu er haft eftir Ingu Rut Gylfadóttur, verkefnisstjóra hópsins, að mikilvægt sé að fá hugmyndir og skýrar forsendur frá sem flestum aðilum, hagsmunaaðilum, íbúum og öðrum áhugasömum svo skipulagið og framtíðarnotkun svæðisins verði sem best. Fulltrúar starfshópsins kynna málið í nýrri félagsmiðstöð í Spönginni á laugardag.

„Nokkur uppbygging hefur átt sér stað en ótal möguleikar eru til aukinnar eða breyttrar nýtingar í framtíðinni,“ segir tilkynningunni.

Hópurinn sem meðal annars á að meta möguleika á uppbyggingu ylstrandar í Gufunesi og smíði brúar út í Viðey, á að skila af sér fyrir 1. október 2014.