Ríkir fá milljarð í skuldaniðurfellingu

Efnahagsmál Rúmlega 200 fjölskyldur sem eiga hreina eign upp á meira en 120 milljónir eiga von á um milljarði í skuldaniðurfellingu samkvæmt upplýsingum frá ríkisskattstjóra.

Það er þó háð því að frumvarp ríkisstjórnarinnar um niðurfærslu höfuðstóls verðtryggðra lána verði samþykkt á Alþingi. Samkvæmt því á að setja 80 milljarða í niðurfærsluna.

Ríkisskattstjóri tók saman yfirlit fyrir efnahags- og viðskiptanefnd Alþingis um skuldir og eignir þeirra sem eru með fasteignalán.

Í samantektinni kemur fram að um 18.500 fasteignaeigendur áttu ekkert um síðustu áramót en skulduðu rúmlega 434 milljarða króna.

Í hópnum sem á eignir frá nokkur þúsund krónum og upp í tíu milljónir eru jafn margir og þeir sem ekkert eiga, eða um 18.500. Fasteignaskuldir þessa hóps nema 314 milljörðum.

229 eru í hópnum sem á hreina eign upp á 120 milljónir. Þessi hópur skuldar 2,2 milljarða í fasteignalán.

Í hópnum sem á næstmest eða hreina eign á bilinu 110 til 120 milljónir eru 87 fjölskyldur. Samtals skulda þessar fjölskyldur innan við milljarð eða um 800 milljónir króna.

Steingrímur J. Sigfússon, þingmaður og fyrrverandi fjármálaráðherra, gagnrýnir harðlega að efnamiklir fái niðurfellingu skulda.

Hann segir að það megi leiða að því líkur að nærri fimm hundruð manns, sem eiga eignir umfram 100 milljónir króna, fái einhverjar niðurfellingar á húsnæðisskuldum sínum. Sumir í hópnum fái væntanlega fulla niðurfellingu eða fjórar milljónir króna. Hann segir að þessu til viðbótar sé verið að fella niður auðlegðarskatt á þetta fólk.

„Maður eiginlega trúir þessu ekki,“ segir Steingrímur.

Steingrímur segir að á meðan hinir efnamestu fái skuldaniðurfellingar fái þeir sem standa verst lítið sem ekkert. Ástæður þess séu meðal annars þær að þessir hópar séu búnir að nýta þau úrræði sem voru í boði fyrir skuldara.