Lið Davids Beckham verður í Miami

David Beckham staðfesti í dag formlega á blaðamannafundi að hann hafi stofnað fótboltalið í MLS-deildinni og verður það staðsett í Miami í Bandaríkjunum.

Beckham verður aðaleigandi félagsins en sjónvarpsframleiðandinn, Simon Fuller, verður einnig meðeigandi að liðinu. Liðið mun reisa knattspyrnuvöll í borginni og gæti liðið tekið þátt í MLS-deildinni árið 2016.

Það hefur lengi verið ljóst að Beckham ætlaði sér að setja á laggirnar fótboltalið í MLS-deildinni en nú hefur það endanlega verið staðfest og verður liðið í Miami.

David Beckham spilaði í 20 ára með nokkrum að flottustu fótboltafélögum heims og varð meistari í fjórum löndum. Hann lagði skóna á hilluna síðasta vor.

Beckham hefur verið skynsamur í samningagerð á ferlinum og hann hafði vit á því þegar hann gerði risasamning sinn við bandaríska félagið Los Angeles Galaxy á sínum tíma að setja inn klausu sem auðveldaði honum að koma með nýtt félag inn í deildina.

David Beckham hélt blaðamannafund ásamt Don Garber, yfirmanni MLS-deildarinnar og Carlos Gimenez, borgarstjóra Miami.

„Af hverju ekki Miami,“ sagði David Beckham á blaðamannafundinum í dag.

„Mig langar að búa til lið alveg frá grunni og setja minn svip á það. Ég tel að Miami sé tilbúinn fyrir fótaboltalið.“

„Ég mun vinna hörðum höndum fyrir þessa borg og liðið í heild sinni. Fjölskyldan mun setjast hér að og ég hlakka mikið til þess að vera búsettur í þessari frábæru borg.“

„Við munum fá heimsklassa leikmenn til liðs við okkur. Einnig verður lögð rík áhersla á að byggja upp gott barna- og unglingastarf til þess að framleiða frábæra leikmenn fyrir Bandaríkin. Ég sé vel fyrir mér að Bandaríska landsliðið geti einn daginn orðið heimsmeistari.“

„Við erum nú þegar byrjaðir að setja saman lista af leikmönnum sem við viljum fá í liðið. Ég hef verið það heppinn í gegnum minn feril að spila með bestu knattspyrnumönnum í heiminum. Þeir hafa nú þegar sent mér nokkur skilaboð og sýnt áhuga á að leika með liðinu í nánustu framtíð.“

Aðspurður hvort hann hefði heyrt í Sir Alex Ferguson og hvort hann hefði áhuga á því að stjórna liðinu svaraði Beckham því neitandi.

„Hann er því miður hættur afskiptum af fótbolta, það hefði verið gaman,“ svaraði Beckham léttur.