Bílastæðasjóður hirðir bíl af Gísla Tryggvasyni

Fyrir um hálfum mánuði hirti Bílastæðasjóður bíl Gísla Tryggvasonar lögmanns og ætlar að bjóða hann upp. Þetta er vegna 5000 króna stöðumælasektar sem Gísli vill ekki greiða vegna þess að hann telur sektina ekki réttmæta.

Enginn hefur tekið málið fyrir og/eða úrskurðað um lögmæti sektarinnar (en lögmaðurinn sem var sektaður neitar að greiða af prinsippástæðum, og hefur nú misst bílinn sinn - þ.e.a.s. bílastæðasjóður vörslusviptir í raun án dóms og laga eftir að hafa úrskurðað í eigin sök án nokkurrar vísunar til laga.

Bíllaus í tvær vikur

„Þeir vísa reyndar til umferðarlaga en þar er tekið fram að það sé ekki hægt að kæra þetta til æðra stjórnvalds. Svo kem ég ítrekað með andmæli að þessum bíl hafi verið lagt í stæði merkt „skólabíll“ að kvöldi dags eftir lok skólatíma. Fyrir framan Laugardalslaugina þar sem alltaf er lagt á kvöldin og um helgar,“ segir Gísli í samtali við Vísi.

Lögmaðurinn hefur reynt að koma þessum andmælum að en Bílastæðasjóður og gjaldheimtan taka ekki mark á því. „Mér hefur enginn kostur gefist á að bera þetta undir óháðan úrskurðaraðila. Og nú er ég búinn að vera bíllaus í tvær vikur og hef reynt að koma þessu til úrskurðar hjá sýslumanni og dómara. En án árangurs ennþá. Staðan er í raun og veru sú að stöðumælavörður getur að óbreyttu komið bílnum í nauðungarsölu ef sýslumaður og dómari geta ekki gripið inní. Það er óásættanlegt og ekkert réttaröryggi í því, að fá enga endurskoðunarmöguleika.“

Málið gæti í raun tengst fleiri stjórnvaldsákvörðunum sem er ekki hægt að áfrýja og því að borgin virðist í raun tekið sér „refsivald“ án þess að fórnarlambið fái rönd við reist.

Um hundrað þúsund komnar í sektir og kostnað

Bíllinn sem um ræðir er kominn til ára sinna, „bara fólksbíll,“ segir Gísli: Volkswagen Bora svartur, árgerð 1999. „Það var fullt af persónulegum munum í bílnum þegar hann var tekinn. Þeir tóku hann í skjóli nætur. Mér gafst ekkert færi á að afhenda bílinn án kostnaður, en kostnaðurinn lendir á mér nema mér takist að sýna fram á að þetta ákvæði umferðarlaganna eigi ekki við að fara beint í uppboð. Því það eigi að vera andmæli og svo fyrirtaka. Þeir fara beint í uppboð án andmæla þannig að ég held að þeir séu að brjóta umferðarlögin með þessu.“

Bílastæðasjóður er harður í horn að taka, að sögn Gísla, og ekki eru þeir þar viljugir til að finna leið til að láta á málið reyna fyrir óháðum úrskurðaraðila. Um hundrað þúsund krónur komnar í sektir og kostnað. „En ég mun krefjast bóta fyrir afnotamissi ef ég vinn þetta mál. Ég vona að sýslumaður taki þetta fyrir og þá get ég krafist þess að fá bílinn aftur.“