Eva Mendes ólétt

Leikkonan Eva Mendes og leikarinn Ryan Gosling eiga von á sínu fyrsta barni saman samkvæmt heimildum tímaritsins Us Weekly.

Heimildarmaður blaðsins segir að Eva sé komin sjö mánuði á leið en sögusagnir um óléttuna fóru á kreik í gærdag.

Eva, 40 ára, og Ryan, 33 ára, hafa verið saman síðan haustið 2011 og eiga þau engin börn fyrir.

Eva hló að kjaftasögum um að hún væri ólétt fyrr á árinu í þætti Ellen DeGeneres.

"Þetta er svo fáránlegt. Þetta byrjaði allt því ég vildi ekki fara í gegnum öryggisskanna á flugvellinum. Þið vitið, röntgenskannar sem eru mjög óhugnalegir? Þá sést maður nakinn er það ekki? Og ekki bara það. Þetta er líka spurning um geislun þannig að ég vil aldrei fara í svona skanna," sagði leikkonan á léttum nótum.

Ryan lenti líka í klóm kjaftasagna á árinu þegar Facebook-síða í hans nafni en ekki á hans vegum birti færslu um að leikarinn hefði ætleidd lítinn dreng.

Ryan og Eva eyddu talsverðum tíma hér á landi í fyrra þegar Ryan var að klippa myndina Lost River ásamt Valdísi Óskarsdóttur en myndin er sú fyrsta sem leikarinn leikstýrir.