Styrkja gott málefni

„Í myndinni eru persónurnar að safna fyrir Umhyggju og þegar við funduðum með aðstandendum Umhyggju þá ákváðum við að gera þetta bara í alvörunni líka,“ segir Davíð Óskar Ólafsson, annar leikstjóra kvikmyndarinnar Bakk, en aðstandendur myndarinnar standa fyrir söfnun fyrir Umhyggju á meðan tökur fara fram.

Myndin segir frá tveimur æskuvinum sem ákveða að bakka hringinn í kringum Ísland til styrktar Umhyggju og í framhaldinu var ákveðið að fara af stað með styrktarherferð þannig að um raunverulega söfnun er að ræða.

„Við ætlum að vekja athygli á myndinni hvar sem við verðum í upptökum og þar af leiðandi vekja athygli á söfnuninni. Við vekjum athygli á söfnuninni á Facebook-síðunni okkar og þá erum við líka að láta búa til níuhundruð-númer fyrir okkur,“ útskýrir Davíð Óskar. Þá er styrktarreikningurinn einnig á vefsíðu Umhyggju.

Spurður út í af hverju Umhyggja varð fyrir valinu segir Davíð Óskar ástæðuna vera þá að félagið sé rekið með styrkjum og innan þess séu um 20 félög sem tengjast langveikum börnum og málefnið afar verðugt.

Tökur á kvikmyndinni Bakk hófust í síðustu viku og eru í fullum gangi. Í gær var hópurinn staddur í hljóðveri FM 957 þar sem verið var að taka upp atriði. „Í þessu atriði eru aðalpersónur myndarinnar að plögga söfnunina sem fer fram í myndinni á FM 957,“ bætir Davíð Óskar við.

Tökur halda áfram út um allt land í kjölfarið en á meðal tökustaða eru Hellissandur, Sauðárkrókur, Akureyri, Húsavík, Egilsstaðir, Höfn í Hornafirði og Vík í Mýrdal. Gert er ráð fyrir að klára upptökur um 10. september.

„Tökurnar ganga rosalega vel og þetta er í raun enn skemmtilegra verkefni en við héldum fyrir,“ segir Davíð Óskar léttur í lund.