Stjórnarher Úkraínu náði ráðhúsinu í Mariupol á sitt vald

Hersveitir Úkraínumanna tóku í morgun völdin í ráðhúsinu í borginni Mariupol í austurhluta Úkraínu.

Til harðra átaka kom á milli þeirra og hóps aðskilnaðarinna sem hafði haft húsið á sínu valdi síðustu vikur. Bardaginn mun hafa borist út á götur borgarinnar að því er fram kemur í erlendum miðlum og hefur eftir úkraínskum miðlum á staðnum en engar fregnir hafa enn borist af mannfalli, hvorki úr röðum stjórnarhermanna né úr hópi aðskilnaðarsinna.

Hart var deilt um refsiaðgerðir gegn Rússum á Bandaríkjaþingi vegna ástandsins í Úkraínu. Menn hafa viljað bíða með slíkt fram yfir forsetakosningar í landinu, sem fyrirhugaðar eru 25. maí, en repúblíkanar segja enga ástæðu til að bíða þess enda óvíst með þær. Þeir leggja hart að Barack Obama forseta að beita Rússa refsiaðgerðum strax.