Olíutankur sem hvarf fyrir tíu árum líklega fundinn

Olíutankur sem Landhelgisgæslan hefur leitað að er að öllum líkindum fundinn. Málmhlutur á stærð við tankinn, sem er þúsund lítra tankur, fannst um 110 sentímetra undir botni Mývatns á fjögurra metra dýpi.  Reynt verður í dag eða á morgun að komast niður að hlutnum.

Umhverfisstofnun mun funda með Landhelgisgæslunni og fara yfir stöðuna. Í kjölfarið verður tekin ákvörðun um hvenær og með hvaða hætti tankurinn verður fjarlægður.

Leit hófst í gær að beiðni Umhverfisstofnunar því óttast er að lífríki vatnsins stafi hætta af olíuleka vegna tanksins. Tankurinn féll af dráttarbáti Kísiliðjunnar fyrir tíu árum síðan en það var síðasta starfsár verksmiðjunnar. Þrátt fyrir umfangsmikla leit það árið fannst tankurinn ekki.

Að sögn Kristins Más Ársælssonar, teymisstjóra Umhverfisstofnunar var tankurinn ekki fullur, en þó sé það óljóst hversu mikið af olíu var í tankinum.

„Allar líkur eru á að þetta sé tankurinn. Við sendum kafara niður eftir honum í dag eða á morgun og þá kemur þetta allt í ljós,“ segir Kristinn.

Hrafnhildur Brynja Stefánsdóttir, upplýsingafulltrúi Landhelgisgæslunnar segir málmleitartækin sem notuð voru þann allra besta tækjakost sem völ er á, tækin séu notuð af séraðgerðar- og sprengjusviði Landhelgisgæslunnar.