Meðalaldur sprautufíkla hækkar verulega

Meðalaldur íslenskra sprautufíkla hefur hækkað mikið á undanförnum árum. Áhyggjuefni segir yfirlæknir á Vogi sem kallar eftir markvissum aðgerðum frá heilbrigðiskerfinu. Um átta sprautufíklar deyja á ári hverju.

Talið er að milli sex til átta hundruð sprautufíklar séu á Íslandi. Stærsti hluti þessa hóps er á aldursbilinu 35 til 45 ára. Nokkuð hátt hlutfall er í aldursflokknum þar fyrir ofan og dæmi eru um sprautufíkla sem leita sér aðstoðar á sjötugsaldri. Rætt var um stöðu sprautufíkla á Íslandi á læknadögum sem fram fóru í Hörpu í vikunni.

Mikilvægt að bregðast við

„Sjúklingarnir eru eldri og eru komnir með fleiri fylgikvilla. HIV smit kom meðal annars inn í þennan hóp fyrir nokkrum árum. Þessi hópur er þyngri fyrir heilbrigðiskerfið og því er mjög mikilvægt að hefja kostbærar aðgerðir sem spara á öðrum stöðum í kerfinu,“ segir Þórarinn Tyrfingsson, yfirlæknir á Vogi.

Veruleg fækkun varð meðal nýrra sprautufíkla á síðasta ári og segir Þórarinn það jákvæð tíðindi. Staðan sé þrátt fyrir það alvarleg. „Þetta er vandamál sem er komið til að vera og heilbrigðiskerfið þarf að bregðast við þessu. Þetta getur orðið mjög kostnaðarsamt,“ bætir Þórarinn við.

Átta láta lífið á hverju ári

Frá árinu 1991 hafa 2.069 sprautufíklar leitað sér aðstoðar hjá SÁÁ. 246 eru látnir á þessu tímabili, þar af 113 undir fertugt. Átta sprautufíklar láta lífið á ári hverju á Íslandi.

Frú Ragnheiður er verkefni sem Rauði krossinn í Reykjavík hefur starfrækt undanfarin ár. Þar geta fíklar fengið hreinar nálar og fræðslu. Markmiðið með starfseminni er skaðaminnkun en sprautufíklar eru í áhættuhópi á að fá alvarlega smitsjúkdóma.

„Það er mjög æskilegt að hið opinbera - ríki og borg - komi með sterkari hætti inn í það að þjónusta þennan hóp á þeirra nærumhverfi. Fyrir þennan svo mjög veika hóp þá getur þetta verið spurning um líf eða dauða,“ segir Þór Gíslason, verkefnastjóri Frú Ragnheiðar hjá Reykjavíkurdeild Rauða krossins.