Kennarar sungu með Pollapönkurum

Grunnskólakennarar fjölmenntu á Ingólfstorgi í morgun og mættu yfir þúsund manns á fundinn. Þá voru baráttufundir haldnir víða um land. Mikill hiti var í kennurum og samstaðan mikil. 

Pollapönkarar stigu á svið og sungu kennarar hátt og snjallt með lögum þeirra. Pönkararnir sömdu lag til stuðnings kennurum undir yfirskriftinni „Betri launakjör“.

Þórður Árni Hjaltested, formaður Kennarasambands Íslands, segir samstöðu meðal kennara mikla.

„Við erum hér til að leggja áherslu á kröfur okkar. Kröfur sem við teljum mjög réttmætar,“ segir Þórður.

Þórður segist þó finna fyrir töluverðri reiði meðal kennara. „En reiðin snýst um það að álagið er mikið í starfinu og félagið er búið að vera samningslaust í nokkurn tíma. Það þarf að stíga þetta skref og leiðrétta þannig að laun grunnskólakennara séu í línu við aðra sérfræðinga í landinu.“

Félag grunnskólakennara og Samband íslenskra sveitarfélaga sátu á fundi hjá ríkissáttasemjara til klukkan sex í morgun eftir átján klukkustunda samningatörn. Fundurinn bar ekki árangur og lögðu kennarar því niður störf í morgun.

„Við viljum vekja athygli á okkar málsstað og stöðu okkar. Við reyndum að semja í alla nótt en það hafðist ekki. En við stöndum vel saman sem kennarar,“ segir Ólafur Loftsson formaður Félags grunnskólakennara. Hann telur þó góðar líkur á að kjaraviðræður náist á næstu dögum.

Að loknum fundi fylktu kennarar og fundarmenn liði frá Ingólfstorgi, yfir Austurvöll og að Ráðhúsinu þar sem borgarstjóra var afhent formleg yfirlýsing frá grunnskólakennurum.

Um 4.300 kennarar lögðu niður störf í morgun og fá því 43 þúsund nemendur ekki kennslu í dag. Vinnustöðvun kennara í dag var sú fyrsta af þremur.  Næsta vinnustöðvun er boðuð 21. maí og þriðja 27. maí.