Breyting á lögum um heilbrigðisstarfsmenn

Heilbrigðisstarfsmönnum verður heimilt að veita heilbrigðisþjónustu á eigin starfsstöð til 75 ára aldurs, með möguleika á framlengingu, í kjölfar breytinga á lögum um heilbrigðisstarfsmenn sem Alþingi samþykkti í gær.

Þetta kemur fram í frétta á vef velferðarráðuneytisins. Þann 1. janúar 2013 tóku gildi ein lög um heilbrigðisstarfsmenn og sérlög um einstakar starfsstéttir féllu úr gildi.

Samkvæmt læknalögum gátu læknar starfað sjálfstætt til 75 ára aldurs og eftir það sótt um undanþágu til þess að starfa áfram, eitt ár í senn.

Þetta breyttist með lögum um heilbrigðisstarfsmenn, þar sem eitt ákvæði gilti um alla heilbrigðisstarfsmenn og kvað á um að heilbrigðisstarfsmönnum væri óheimilt að reka eigin starfsstofu eftir sjötugt en þó með möguleika á framlengingu til tveggja ára að 76 ára aldri, senn samkvæmt undanþágu frá Embætti landlæknis.

Með lagabreytingunni hækka starfsaldursmörkin í 75 ár og verður heilbrigðisstarfsmönnum óheimilt að veita heilbrigðisþjónustu eftir þann aldur nema að fenginni undanþágu frá Embætti landlæknis.

Að uppfylltum skilyrðum getur embættið veitt undanþágu til allt að þriggja ára í senn í fyrsta skipti en eftir það til eins árs í senn.

Lögin sem samþykkt voru á Alþingi í gær og fela í sér framangreindar breytingar öðlast gildi 1. júlí 2014.