Piltunum fimm sleppt

Héraðsdómur Reykjavíkur hefur hafnað kröfu ákæruvaldsins um áframhaldandi gæsluvarðhaldi yfir piltunum fimm sem grunaðir eru um að hafa nauðgað sextán ára stúlku þar síðustu helgi. Þeim verður því sleppt í dag.

Lögreglan krafðist þess að gæsluvarðhald yfir piltunum yrði framlengt um einn mánuð samkvæmt heimildum Vísis.

Gæsluvarðhaldsúrskurður sem staðfestur var fimmtudaginn 8. maí rann út í dag klukkan fjögur. Piltarnir eru allir staðsettir á lögreglustöðinni á Hverfisgötu og verður þeim sleppt þaðan.

Drengirnir fimm hafa verið í einangrun á Litla Hrauni frá 9. maí og hafa yfirheyrslur staðið yfir síðan.

Piltarnir eru á aldrinum 17 til 19 ára. Stúlkan kærði nauðgunina til lögreglu á þriðjudaginn 6. maí. Í kjölfar kærunnar voru piltarnir handteknir og í greinargerð lögreglu kemur fram að símar þeirra og tölvur hafi verið haldlagðar.

Kærðu hafi allir gengist við því að hafa haft samfarir við stúlkuna en sagst hafa talið það hafa verið með hennar samþykki. Kærðu beri þó ekki saman um atburðinn og atburðarás tengda honum.

Atvikið mun hafa átt sér stað í Breiðholti aðfaranótt sunnudagsins 4. maí. Það mun hafa verið tekið upp á myndband af einum hinna fimm og gengið á milli fólks síðan verknaðurinn átti sér stað.

Það mun þó ekki vera aðgengilegt á internetinu en lögregla hefur það undir höndum.