Baldur: Er ekki alveg að átta mig á þessu

„Þetta var klárt fyrir helgi en félagið vildi geyma það fram yfir helgi að tilkynna um samninginn. Ég er himinilifandi með þetta," segir Baldur Sigurðsson, fyrirliði KR, en hann yfirgefur félagið um áramótin.

Baldur er búinn að semja við danska úrvalsdeildarfélagið SönderjyskE. Samningurinn er til eins árs með möguleika á framlengingu til átján mánaða.

„Ég lít á þetta sem tveggja og hálfs árs samning. Ég ætla að standa mig og ekki bara vera þarna í eitt ár. Ég er mjög spenntur fyrir þessu dæmi. Mér leist mjög vel á félagið og ég fékk líka fínan samning."

Það hefur legið í loftinu í talsverðan tíma að Baldur færi til félagsins en málið hefur tekið sinn tíma. Miðjumaðurinn úr Mývatnssveit er ekki með neinn umboðsmann og hann segir báða aðila hafa verið að vanda sig og ekki legið lífið á.

„Það var mjög sérstakt hvernig þetta kom allt upp. Ég var ekkert að stefna á neina atvinnumennsku en fer þarna til þeirra í smá skoðun og enda svo með samning. Ég er ekki alveg að átta mig á þessu."

Baldur segir það hafa líka skipt máli að vinnuveitandi hans, Mannvit, geri honum kleift að sinna sínu starfi áfram ytra.

„Ég er rosalega ánægður í vinnunni minni og frábært að geta sinnt henni áfram úti. Vonandi gengur það upp til lengdar."

Miðjumaðurinn sterki, sem oftar en ekki gengur undir nafninu Smalinn, er á leið inn í spennandi ár. Hann fer til æfinga hjá félaginu í byrjun janúar og þá er einnig nóg að gerast hjá fjölskyldu hans.

„Unnustan mín er ólétt og á að eiga í byrjun janúar þannig að þetta verður eitthvað stress og púsluspil í byrjun ársins," sagði Smalinn léttur.