Bandaríkjamenn og bandamenn þeirra hófu í nótt loftárásir á bækistöðvar hins íslamska ríkis innan landamæra Sýrlands. Þau ríki sem þátt taka í árásunum ásamt Bandaríkjamönnum eru öll af Arabíuskaganum að því er talsmaður hersins segir en þetta er í fyrsta sinn sem látið er til skarar skríða gegn vígamönnunum innan sýrlensku landamæranna.

Orrustu- og sprengjuþotur tóku þátt í árásunum og þá var einnig notast við Tomahawk flugskeyti sem skotið er frá Bandarískum herskipum. Hingað til hefur aðeins verið ráðist gegn samtökunum í Írak og hafa um 190 árásir þegar verið gerðar þar.