Farsælustu hjónabönd Hollywood: Skrifaði bréf með blóði sínu

Stjörnurnar í Hollywood eru ekki síður þekktar fyrir stormasöm sambönd og hjónabönd heldur en leik og listir. Þó eru nokkur dæmi um ástarsambönd sem hafa tekist vel og lifað yfir áratugi. Hér eru tekin saman nokkur hjónabönd milli stjarnanna sem staðið hafa storminn. Hvort rómantík á borð við þá sem Keith Richards bauð Patti Hansen upp á þegar hann sendi henni bréf skrifaða með blóði sínu eða sú taktík að halda sambandinu frá fjölmiðlum sé lykillinn að farsælu hjónabandi skal ósagt látið. 



1. Kevin Bacon og Kyra Sedgwick [sjá efstu mynd til hægri]

Kevin Bacon og Kyra Sedgwick kynntust við tökur á leikritinu Lemon Sky, eða Sítrónugulur himinn, fyrir sjónvarpstöðina PBS. Sedgwick hreifst ekki umsvifalaust að Bacon. „Hann var ekki nógu vinalegur, hann var með leiðindaviðmót,“ sagði hún um fyrstu kynni þeirra. Bacon vissi þetta vel. „Ég var hrifnari af henni en hún af mér. Ég held að henni hafi fundist ég hrokafullur og tilgerðarlegur.“ Hann bauð henni á stefnumót nokkrum sinnum eða þangað til hún samþykkti. Þau giftu sig nokkrum mánuðum síðar.

Gengu í hjónaband: 4. september 1988.

2. Michael J. Fox og Tracy Pollan

Michael J. Fox er hvað þekktastur fyrir hlutverk sitt sem Marty McFly í myndinni Back to the Future. Hann hefur einnig verið áberandi í umræðunni um Parkinson sjúkdóminn en hann greindist með hann árið 1991. Tracy Pollan er einna þekktust fyrir hlutverk sitt sem kærasta Fox í þættinum Family Ties. En það var einmitt við tökur á þættinum sem þau kynntust fyrst en ekkert gerðist þar sem Pollan var í sambandi. „Það var ekki það að ég væri ekki hrifin af honum – ég var bara að hitta annan mann,“ sagði Pollan þegar þau hjónin fóru í viðtal til Opruh. Fox svaraði þá að bragði: „Það var ekki það að ég væri ekki hrifinn af henni – gaurinn sem hún var með var bara stærri en ég.“ Þau byrjuðu svo saman árið 1987. 

Gengu í hjónaband: 16. júlí 1988  

3. Tom Hanks og Rita Wilson

Leikararnir Tom Hanks og Rita Wilson kynntust upphaflega árið 1981 við tökur á gamanþáttaröðinni Bosom Buddies þar sem Hanks lék aðalhlutverk en Wilson fór með hlutverk í einum þættinum. Þremur árum síðar léku þau bæði í myndinni Volunteers og neistar flugu. Hanks skildi við konuna sína og Wilson hætti með unnusta sínum. „Ég vissi ekki hvað ást var fyrr en ég hitti Tom,“ sagði Wilson.

Gengu í hjónaband: 30. apríl 1988

4. Julia Louis-Dreyfus og Brad Hall

Julia Louis-Dreyfus er góðkunningi allra aðdáanda Seinfeld þáttana og eiginmaður hennar er fyrrum Saturday night live grínisti sem vinnur nú bakvið tjöldin við þáttagerð. Parið kynntist í Northwestern háskólanum þar sem þau tóku bæði mikinn þátt í grínsenunni þar. Þau vöktu bæði svo mikla athygli að þáverandi framleiðandi Saturday night live, Dick Ebersol, réð þau beint úr skólanum. Louis-Dreyfus og Hall hafa verið saman allar götur síðan. „Brad var sá eini rétti og hefur verið sá eini rétti síðan þá,“ segir leikkonan um eiginmann sinn.



Gengu í hjónaband: 25. júní 1987

5. Mark Harmon og Pam Dawber

Stjarna þáttanna NCIS, Chicago Hope og St. Elsewhere Mark Harmon tjáir sig ekki mikið um samband sitt og konu sinnar Pam Dawber sem þekkt er sem Mindy í þáttunum Mork og Mindy. Samkvæmt slúðurmiðlum vestanhafs kynntust þau í gleðskap í mars árið 1986, tveimur mánuðum eftir að Harmon var valinn kynþokkafyllsti maður heims af tímaritinu People. „Þegar ég gifti mig, þá vil ég að það sé allt sem þessi bær segir að það geti ekki verið. Ég er ekki fyrir lauslæti,“ sagði Harmon í viðtalinu sem var tekinn við hann þegar hann hlaut titilinn eftirsótta. Harmon og Dawber giftu sig í mars ári síðar. 

Gengu í hjónaband: 21. mars 1987

6. Jamie Lee Curtis og Christopher Guest

Jamie Lee Curtis er grínleikona af guðs náð og hefur átt mikilli velgengni að fagna í Hollywood og maðurinn hennar, Christopher Guest, er leikstjóri í sama geira. Mörgum árum áður en hjónakornin kynntust sá Curtis mynd af Guest í tímaritinu Rolling Stone þar sem hann var að koma myndinni Spinal Tap á framfæri og sagði við vin sinn: „Ég ætla að giftast þessum manni.“ Hún hringdi í hann án þess að hafa undirbúið það nokkuð en hann hringdi aldrei tilbaka. Mörgum mánuðum síðar mættust augu þeirra á veitingastað sem þá var vinsæll í Hollywood og hét Hugo‘s. Hann hringdi daginn eftir og þau giftu sig um hálfu ári síðar.



Gengu í hjónaband: 18. desember 1984

7.  Keith Richards og Patti Hansen

Keith Richards er gítarleikari einnar frægustu rokksveitar heims, Rolling Stones, og Patti Hansen er fyrirsæta. Þau eiga tvær dætur sem fetuðu í fótspor móður sinnar í fyrirsætuheiminum, Theodora og Alexandra. Parið kynntist upphaflega árið 1979 þegar Richards bauð Hansen upp á kampavín á skemmtistaðnum Studio 54 og síðan byrjuðu þau saman í 36 ára afmæli Richards nokkrum mánuðum síðar. Hansen lýsir manni sínum sem rómantískum, hann hafi verið duglegur við að búa til safnspólur handa henni og sendi henni bréf sem hann skrifaði með sínu eigin blóði. Þrátt fyrir að foreldrar hennar hafi ekki verið par sáttir í fyrstu, sérstaklega eftir að Richards braut gítarinn sinn í fylleríi á borðstofuborðinu þeirra, giftu þau sig árið 1983 og Mick Jagger var svaramaður.

Gengu í hjónaband: 18. desember 1983

8. Ozzy og Sharon Osbourne

Rokkgoðin Ozzy og Sharon Osbourne vöktu heimsathygli þegar raunveruleikaþátturinn Osbourne-fjölskyldan fór í loftið á MTV stöðinni árið 2002. Þau kynntust í gegnum föður hennar, Don Arden, sem var umboðsmaður Black Sabbath þegar 17 ára gömul dóttir hans kynntist höfuðpaur sveitarinnar Ozzy. Árið 1979 var Ozzy kominn á fullt með sólóferil sinn, Sharon var ástmey hans og umboðsmaður og þau voru gift þremur árum síðar.

Gengu í hjónaband: 4. júlí 1982