"Okkur gæti ekki verið meira sama hvað öðrum finnst"

Ríkey Garðarsdóttir og Margrét Sigurðardóttir, eða Magga Massi eins og hún er kölluð, eru ástfangnar og hafa verið síðustu 17 ár. Þær ræða þeirra fyrstu kynni og fordómana sem þær láta ekki hafa áhrif á sig lengur.

Hvenær ákváðuð þið að koma út úr skápnum?  „Opinberlega á síðustu öld. Við erum búnar að vera giftar í næstum fimmtán ár. Við höfum verið saman í næstum sautján ár. Mæður okkar unnu saman þegar við vorum litlar og þá vorum við stundum saman með þeim að lita í vinnunni. Svona er lífið skrítið stundum."

Hvar kynntust þið? „Við kynntumst í líkamsræktarstöðinni Gym 80. Ríkey kom í einkaþjálfun til mín og ég kolféll fyrir þessum fallega gleðigjafa. Hún er nefnilega alltaf svo kát þessi elska og svo er hún með hjarta úr gulli," segir Magga.

Þá tekur Ríkey til máls: „Ég var vör um mig í upphafi og hélt henni í vissri fjarlægð en við urðum fljótlega vinkonur. Þegar ég fór að kynnast Möggu minni þá komst ég inn fyrir þennan þykka töffara skráp sem hún var búin að mynda gagnvart öllum.  Þá varð ég ægilega skotin og ekki leið á löngu þar til við vorum orðnar ástfangnar upp fyrir haus. Við höfum alltaf verið bestu vinir og sálufélagar og viljum gera allt saman Magga er þessi ofur töffari og margir halda að hún hafi ekki „hjarta" en hún er svo hjartahlý og góð persóna þegar maður kynnist henni. Ég gæti ekki hugsað mér lífið án hennar."

Þegar talið berst að fordómum gagnvart kynhneigð þeirra segir Magga:  „Já, bæði áður og því miður enn svolítið í dag en það snertir okkur ekki neitt lengur. Okkur gæti ekki verið meira sama hvað öðrum finnst á meðan það snýr að okkur tveimur. Verra er ef einhver særir ástvini okkar, þá sýnum við klærnar."

„Það skiptir svo miklu máli að vera maður sjálfur og láta ekki aðra hafa áhrif á það. Það er yndislegt að sjá hvað unga fólkið á auðvelt með að koma út úr skápnum í dag og vera það sjálft." 

Fá ennþá fiðrildi í magann



„Við erum heppnar. Við fundum ástina saman og fáum enn fiðrildi í magann þegar við til að mynda knúsumst en við höfum alltaf passað upp á að rækta garðinn okkar og lifa heilbrigðu lífi. Við elskum að vera úti í náttúrunni, fara í tjaldútilegur og kúra við kertaljós upp í sófa með stelpunum okkar Heru og Shebu, sem eru Pug hundar. Hamingjan þarf ekki að vera svo flókin," segir Ríkey einlæg.

„Gay by birth, proud by choice," bætir Magga við.