Telja RÚV hafa flutt leikverk í óleyfi

Samninganefnd Félags leikstjóra á Íslandi sleit í gær viðræðum við Ríkisútvarpið ohf (RÚV) eftir tveggja daga samningalotu með ríkissáttasemjara. Í tilkynningu frá félaginu segir að launatölur samningsins hafi ekki tekið neinum breytingum frá árinu 2005 og að sömu sögu sé að segja um greiðslur RÚV til leikstjóra vegna endurflutnings verka. Félagið telur RÚV hafa með skipulögðum hætti brotið ákvæði kjarasamningsins og flutt eldri verk án leyfis, en samkvæmt gildandi kjarasamningi er endurflutningur á verkum háður skriflegu leyfi leikstjóra. Þá telur félagið RÚV hafa skotið sér undan skilum á samningsbundnum launatengdum gjöldum.

Í tilkynningunni segir jafnframt að ítrekaðar tilraunir hafi verið gerðar af hálfu félagsins til að fá forsvarsmenn RÚV að samningaborði en að þeim tilraunum hafi verið mætt af áhuga- og sinnuleysi.

Félagið kemur til með að sækja skaðabætur og fullar greiðslur vegna þeirra verka sem Útvarpsleikhúsið hefur flutt í óleyfi. Samninganefnd RÚV var tilkynnt að félagið muni leita allra leiða til að tryggja hagsmuni félagsmanna og hagsmuni látinna félaga og erfingja þeirra jafnframt, sem nú fara með höfundarrétt þeirra.

„Félag leikstjóra á Íslandi er reiðubúið að grípa til nauðsynlegra aðgerða til að tryggja rétt leikstjóra með það að markmiði að tryggja þeim sanngjörn kjör fyrir störf sín ásamt því að knýja Ríkisútvarpið til að virða þann rétt sem leikstjórar eiga yfir verkum sínum,“ segir í tilkynningunni.

Margrét Magnúsdóttir, forsvarsmaður Ríkisútvarpsins í samningaviðræðunum, segir í samtali við RÚV að leikstjórar hafi fengið greitt fyrir verk sín og þeir hafi tekið við greiðslum athugasemdalaust.

Saminganefnd Ríkisútvarpsins var skipuð lögfræðingi frá Samtökum atvinnulífsins ásamt staðgengli útvarpsstjóra og nýverið hóf nýr skrifstofustjóri RÚV þátttöku í viðræðunum, þegar mannabreytingar urðu í framkvæmdastjórn stofnunarinnar. Eftir að sáttasemjari ríkisins tók kjaradeiluna til sín hefur hann boðað deiluaðila til þriggja samningafunda en samninganefndir aðila hafa einnig haldið fundi sín í milli.

Samninganefnd FLÍ hafa skipað þau Páll Baldvin Baldvinsson formaður, Jón Páll Eyjólfsson og Kolbrún Halldórsdóttir stjórnarmenn FLÍ. Næsta verkefni nefndarinnar er að hefja samningaviðræður við Leikfélag Reykjavíkur í Borgarleikhúsi og Fjármálaráðuneyti fyrir hönd Ríkissjóðs vegna starfa leikstjóra við Þjóðleikhúsið.