Gunnar Þórðarson borgarlistamaður Reykjavíkur í ár

Dagur B. Eggertsson borgarstjóri útnefndi í dag Gunnar Þórðarson tónlistarmann Borgarlistamann Reykjavíkur 2014. Útnefningin fór fram í Höfða og gerði Einar Örn Benediktsson, fráfarandi formaður menningar- og ferðamálaráðs, grein fyrir vali ráðsins á borgarlistamanni.

Gunnar er landsþekktur fyrir dægurlagasmíðar sínar undanfarna áratugi, meðal annars með hljómsveitunum Hljómar og Trúbrot, en hann samdi einnig tónlistina í óperunni Ragnheiður, sem sló í gegn í Hörpu í vetur. Gunnar hlaut fyrir Ragnheiði Grímuverðlaunin í gær fyrir tónlist ársins í leiksýningu, þannig að vikan byrjar nokkuð vel hjá söngvasmiðnum.

Við þetta tækifæri var Gunnari veittur ágrafinn steinn, heiðursskjal og viðurkenningarfé og Þóra Einarsdóttir og Snorri Sigfús Birgisson fluttu aríu úr Ragnheiði.