Opnar íslenskan pylsuvagn í Cambridge

Fyrsti íslenski pylsuvagninn í Cambridge á Englandi kemur til með að líta dagsins ljós í sumar. Boðið verður upp á íslenskar pylsur frá SS, íslenskt sinnep og remúlaði og verður brauðið sérbakað.

„Ég er sjálf kokkur, hef verið með veisluþjónustu lengi en var orðin dálítið leið á því og langaði að gera eitthvað sniðugt. Ég hugsaði til Íslands og það fyrsta sem kom í hugann var Bæjarins Bestu,“ segir Nína Waldmann, eigandi pylsuvagnsins SkandiDoggs.

Nína stefnir á að opna pylsuvagninn á matarhátíð í Cambridge í júní og hefur hún þegar verið bókuð í veislur og aðrar skemmtanir. „Við ætlum að byrja á að ferðast með vagninn um Cambridge og halda síðan til London. Við erum þegar farin að skoða ýmsar staðsetningar þar.“

Hún segir mikla tilhlökkun ríkja, hjá Íslendingum sem og innlendum. „Allt skandínavískt er gríðarlega vinsælt hér. Fjöldinn allur af fólki hefur komið til mín og lýst yfir tilhlökkun sinni.“

Til að byrja með kemur Nína til með að standa vaktina sjálf en þegar nær dregur kemur ætlar hún að ráða annað starfsfólk. Pylsuvagninn er ekki alveg klár, enn á eftir að setja á hann merkingar en líklega verður hann skreyttur í fánalitum Íslands.

„Vagninn er mjög lítill, en nægilega stór,“ segir Nína og bætir við að hún sé virkilega spennt fyrir áframhaldinu.

@SkandiDoggs Hello. Excited by the prospect of mutilating some Skandi Dogg! :p

— Mo' Pho Street Food (@mophostreetfood) May 13, 2014

Nína bendir áhugasömum á Twitter aðgang pylsuvagnsins, SkandiDoggs.