Reynir að komast inn á Evrópuþingið

Silja Borgarsdóttir Sandelin er að ljúka meistaragráðu í stjórnmálafræði og hefur tekið þátt í stjórnmálum í fimm ár. Hún býður sig nú fram til Evrópuþingsins í annað sinn.

Evrópuþingið fer með löggjafarvald í Evrópusambandinu ásamt Evrópuráðinu og hefur vægi þingsins aukist mikið. Það samþykkir meðal annars fjárlög sambandsins, gegnir eftirlitshlutverki gagnvart öðrum stofnunum og fjallar um mannréttindamál.

Silja býður sig fram fyrir Svenska folkpartiet, sem er sænskumælandi miðjuflokkur, og kosið verður 25. maí.

„Ég er búin að tala mikið um frið og öryggi í Evrópu og aukið jafnrétti. Svo er ég með bakgrunn í háskólapólitíkinni svo ég hef líka talað um lærdóm og rannsóknir,“ segir hún, en nánar er rætt við hana og sýnd brot úr kosningamyndbandi hennar í meðfylgjandi myndskeiði. „Mig langar að sjá til þess að við höfum Evrópu þar sem er öryggi án þess að gripið sé til vopna.“

Silju langar að flytja til Íslands einhvern daginn og segir skemmtilegt að skarta íslensku nafni í kosningabaráttunni. „Fólki finnst spennandi að vera með íslenskt nafn og margir vita að ef þú heitir Borgarsdóttir eru miklar líkur á að þú sért Íslendingur. Það er dálítið gaman,“ segir hún að lokum.