„Þeir ríkustu fá gjafir frá þessari ríkisstjórn“

Árni Páll Árnason gagnrýndi ríkisstjórnina harðlega í ræðu sinni í eldhúsdagsumræðum á Alþingi í kvöld. Árni var fyrsti ræðumaður kvöldsins. Hann sagði ríkisstjórnina ekki hafa verið aðgerðalitla á þessu fyrsta ári við stjórnvölinn:

„Mörgum finnst hún aðgerðalítil – en hún er nú samt búin að ná að lækka veiðigjald á stórútgerðina tvisvar á tæpu ári. Það hlýtur nú að teljast einhvers konar dugnaður.

Skattbreytingar hennar hafa létt sköttum af þeim allra best settu og aukið byrðar á meðaltekjufólk og lágtekjufólk. Og skuldaniðurfellingar eru svo ómarkvissar að þær munu flytja peninga frá venjulegu fólki til þeirra ríkustu og eignamestu, frá landsbyggð til höfuðborgar og frá ungu fólki, lágtekjufólki og lífeyrisþegum til vel stæðs fólks á besta aldri.“

Árni Páll sagði að almenningur sé farinn að átta sig á skaðsemi ójöfnuðar í samfélögum. Vinsælasta bókin á Amazon, sé hagfræðibók:

„Mest selda bókin á Amazon þessa dagana er ekki bók um hvernig megi missa tíu kíló á tíu dögum, heldur hagfræðibók eftir Thomas Piketty sem fjallar um skaðsemi ójafnaðar. Um að auður safnist óhjákvæmilega á sífellt færri hendur ef ekkert verði að gert. Um mikilvægi þess að leggja háa skatta á mikinn auð, til að skapa almenn tækifæri og félagslegt réttlæti.“

Árni Páll sagði ennfremur að ríkisstjórnin væri ekki í takt við það sem gengur og gerist annarsstaðar í heiminum:

„Ekkert sýnir betur hversu úrelt viðhorf ríkisstjórnarinnar eru. Það er eins og deigla nýrra hugmynda um allan heim hafi algerlega farið framhjá þeim flokkum sem nú fara með landsstjórnina. Þeir stjórna í þágu fárra og reyna ekki einu sinni að fela það. Þess vegna þarf ný stjórnmál gegn gömlu pólitíkinni.“

Árni Páll vék einnig orðum sínum að Evrópusambandsmálum. Hann sagði ríkisstjórnina hafa lagt fram óskynsamlega tillögu og þjóðin hafi í sameiningu sagt: „Nei“.

Hann sagði verkalýðshreyfinguna og fyrirtækin í landinu hafa verið einhuga í andstöðu sinni.

„Mótmæli tugþúsunda, undirskriftir nærri 54 þúsund kjósenda og skýr niðurstaða í hverri könnunni á fætur annarri sýndu stjórnmálamönnunum eindreginn vilja þjóðarinnar: Að hún vildi sjálf ráða ferðinni í samskiptunum við Evrópusambandið

Skyndilega varð ljóst að þrátt fyrir að gamlir stjórnarflokkar með úreltar hugmyndir sitji við stjórnvölinn hefur veruleikinn breyst. Traustur þingmeirihluti dugði ekki ríkisstjórninni til að koma tillögunni í gegnum Alþingi. Afl þjóðarinnar leystist úr læðingi með alveg nýjum hætti.

Fyrir nokkrum árum hefði þessi atburðarás verið óhugsandi.“

Tweets about '#eldhusdagur' Twitter / Search - #eldhusdagur twitter.com