Sofnaði á skemmtistað í Reykjavík og var grunaður um innbrot

Ungur karlmaður, sem var handtekinn inni á lokuðum veitingastað í Reykjavík á fjórða tímanum í nótt, grunaður um innbrot, reyndist sára saklaus.

Hann hafði gleymst inni á staðnum og verið læstur þar inni þegar starfsfólkið fór heim. Hann sagðist hafa verið orðinn nokkuð drukkinn og þreyttur og ákveði að halla sér aðeins áður en hann héldi heim, en hafi svo rumskað af værum blundi við að hann var einn á staðnum og komst ekki út.

En við þær tilraunir fór þjófavarnakerfi í gang. Þar sem hann hafði ekki sýnt neina tilburði til þjófnaðar tók lögregla skýringu hans gilda og fékk hann að fara heim, saklaus en timbraður.