Þórsarar fá varla stig þegar Chuck er ekki með

Þórsarar hafa tapað tveimur fyrstu leikjum sínum í Pepsi-deildinni og eru stigalausir eins og Fylkismenn. Í báðum leikjunum hefur liðið leikið án ChukwudiChijindu og það munar mikið um bandaríska framherjann.

Chukwudi Chijindu skoraði 10 mörk í 18 deildarleikjum Þórsliðsins í Pepsi-deildinni síðasta sumar og Þórsliðið fékk 22 af 24 stigum sínum í þessum 18 leikjum.

Þórsliðið hefur nú spilað sex leiki án Chuck í Pepsi-deildinni tvö síðustu sumur og aðeins náð í samtals tvö stig í þeim. Liðið hefur ennfremur aðeins náð í samtals þrjú stig í þeim níu leikjum þar sem Chuk hefur ekki verið í byrjunarliðinu hjá Páli Viðari Gíslasyni.

Chukwudi Chijindu skoraði ekki aðeins þessi tíu mörk því hann átti einnig þátt í undirbúningi fimm marka til viðbótar.

Tölfræðin sýnir það svart á hvítu að Þórsarar þurfa á Chuck að halda og enn eitt dæmið um það að hann skoraði í öllum sex sigurleikjum liðsins síðasta sumar.

Þór án Chukwudi Chijindu í Pepsi-deildinni 2013-14:

2013

Breiðablik (úti) 1-4 tap

KR (heima) 1-3 tap

Valur (úti) 2-2 jafntefli

Fram (heima) 1-1 jafntefli

2014

Keflavík (úti) 1-3 tap

Fjölnir (heima) 1-2 tap

Samantekt:

6 leikir án Chuck

0 sigrar - 2 jafntefli - 4 töp

2 stig í húsi

Markatalan: -8 (7-15)