Þingmenn láti af kjánaskap

Þingmenn stjórnarandstöðunnar kölluðu skuldaniðurfellingar frumvörp ríkisstjórnarinnar aprílgabb á Alþingi í dag, en umræðum um frumvörpin var óvænt frestað. Stjórnarliðar sögðu stjórnarandstöðuna geta slakað á, því ríkisstjórnin myndi standa við loforð sín.

Katrín Júlíusdóttir sagði enga haldbæra skýringu hafa verið gefna á því að fjármálaráðherra mælti ekki fyrir skuldaniðurfellingarfrumvörpunum á Alþingi í dag. Um sé að ræða 80 milljarða framlög úr ríkissjóði og annað eins úr séreignasparnaði.  Samkvæmt skýrslu ríkisstjórnarinnar sjálfrar kæmi fram að mun hærri framlög hafi farið til skuldugra heimila í tíð síðustu ríkisstjórnar og þeir fjármunir hafi ekki komið úr ríkissjóði eða heimilunum sjálfum.

„Blaðsíða 53 í skýrslunni sem hæstvirtur fjármálaráðherra og hæstvirtur forsætisráðherra kynntu í Hörpunni í nóvember síðast liðnum. Staðreyndirnar tala sínu máli. Heimsmetið er miklu, miklu minna heldur en það sem kom frá fráfarandi ríkisstjórn til heimilanna í landinu,“ sagði Katrín.

Þorsteinn Sæmundsson þingmaður Framsóknarflokksins sagði ríkisstjórnina vera að uppfylla stærsta kosningaloforð sitt eftir aðeins tíu mánuði við völd, einn dagur til eða frá skipti ekki máli.

„En verið ekki svona bitur, kæru þingmenn. Þetta kemur allt og þetta er allt á áætlun. Öll þessi stóru mál eru á áætlun. Verið bara róleg. Allt gerist og góðir hlutir gerast í réttri röð. Þetta er allt að gerast. Nú skulum við ekki vera bitur. Við skulum vera glöð. Ég skil ekki að menn skuli vera svona bitrir þegar það er ástæða til að gleðjast fyrir hönd heimilanna í landinu,“ sagði Þorsteinn.

Ragnheiður Ríkharðsdóttir þingflokksformaður Sjálfstæðisflokksins sagði alla vita að margt hefði verið vel gert í tíð fyrri ríkisstjórnar.

„Það er kjánalegt af þingmönnum þjóðarinnar að standa hér hver um annan þveranog keppast við að mæra sína stjórn eða fráfarandi stjórn. Tökum nú einhvern tíma höndum saman í því verkefni sem er fyrir heimilin í landinu, að ná tökum á þeim vanda sem þau standa frami fyrir,“ sagði Ragnheiður .