Dýrkeypt að taka rangar ákvarðanir í húsnæðismálum

Félagsmálaráðherra segir mikilvægt að ná víðtækri sátt um nýtt húsnæðiskerfi og úrbætur á leigumarkaði. Reynslan sýni að það geti reynst dýrt að taka rangar ákvarðanir í þessum málaflokki. Þingmenn kölluðu eftir tafarlausum úrbótum af hálfu stjórnvalda á Alþingi í dag.

Þingmenn eru flestir sammála um að núverandi húsnæðiskerfi sé í ólestri og á því þurfi að gera breytingar, og þá alveg sérstaklega hvað varðar leigumarkaðinn. En frumvarp þar að lútandi kemur ekki fram á þessu vorþingi því frestur til að leggja fram frumvörp rann út í dag og verkefnisstjórn sem félagsmálaráðherra skipaði skilar ekki af sér fyrr en í lok apríl.

Alþýðusambandið og fleiri hafa kallað eftir nýrri hugsun í húsnæðismálum og þá ekki hvað síst á leigumarkaðnum og í uppbyggingu félagslegs húsnæðis. Verkefnisstjórn á vegum félagsmálaráðherra hefur verið að störfum frá því í fyrra vor en ráðherra hefur lagt áherslu á víðtækt samstarf um mótun nýrrar húsnæðisstefnu.

Árni Páll Árnason formaður Samfylkingarinnar hóf umræðu um þessi mál á Alþingi í dag og ýtti á eftir aðgerðum.

„Það er alvarlegt ástand á húsnæðismarkaði og húsnæðisöryggi ungs fólks, millitekjufólks, lágtekjufólks, er ógnað. Við vitum öll að húsnæði er ekki á viðráðanlegum kjörum. Kaup og leiga er einungis á færi þeirra efnameiri,“ sagði Árni Páll.

Þá væri of mikið framboð á stóru húsnæði en skortur á minna húsnæði bæði til kaups og leigu. Árni Páll minnti á tillögur Samfylkingarinnar um samræmdar húsnæðisbætur, undanþágu frá skatti af leigutekjum á einni íbúð og fleira.

„Og því vil ég spyrja ráðherra hvað líður aðgerðum? Hvað líður raunverulegum úrbótum og þá alveg sérstaklega, mun ráðherra leggja til við gerð fjárlaga að fé verði veitt til að hækka stórlega húsaleigubætur svo hægt verði að koma á nýju kerfi,  sameiginlegu kerfi húsaleigu og vaxtabóta undir nafni húsnæðisbóta,“ spurði formaður Samfylkingarinnar.

Eygló Harðardóttir félagsmálaráðherra sagði mikilvægt að styrkja leigumarkaðinn með öllum ráðum og að öllum fjölskyldum yrði tryggt val og öryggi í húsnæðismálum.

„Og ég held að við öll sem sitjum hér gerum okkur mjög vel grein fyrir því hversu dýrkeypt það getur verið fyrir okkur að taka rangar ákvarðanir varðandi uppbyggingu húsnæðismarkaðarins hér á Íslandi. Þannig að það er það sem verkefnisstjórnin hefur verið að gera, hún hefur verið að vanda vinnu sína,“ sagði Eygló.

Verkefnisstjórnin muni skila af sér tillögum í lok apríl.