Þrengstu harðlínusjónarmið ráða för

Þorsteinn Pálsson, fyrrverandi formaður Sjálfstæðisflokksins, segir rangt að pólitískur ómöguleiki sé í stöðunni í evrópumálum. Formaður Sjálfstæðisflokksins hafi hins vegar kosið að láta undan mestu harðlínumönnum í flokknum.

Bjarni Benediktsson fjármálaráðherra og formaður Sjálfstæðisflokksins hefur sagt að það sé pólitískur ómöguleiki fyrir flokkinn að standa að aðildarviðræðum við Evrópusambandið.

Sjálfstæðir evrópumenn minna hins vegar á kosningaloforð formanns flokksins. Þorsteinn Pálsson fyrrverandi formaður flokksins og forsætisráðherra segir engan pólitískan ómöguleika í stöðunni.

„Í fyrsta lagi var náttúrlega alveg ljóst þegar loforðið var gefið að þessar aðstæður voru fyrir hendi. En það sem skiptir mestu máli í stöðunni eins og hún er í dag er að fundur Sjálfstæðra evrópumanna á föstudaginn var beindi tveimur erindum til þingflokks Sjálfstæðismanna,“ segir Þorsteinn.

Annars vegar að endanlegri ákvörðunartöku stjórnvalda yrði frestað þar til skýrsla Alþjóðastofnunar Háskólans lægi fyrir og hins vegar að ef ríkisstjórnin ætlaði að slíta viðræðunum við Evrópusambandið yrði gildistaka þeirrar ákvörðunar háð niðurstöðu í þjóðaratkvæðagreiðslu.

„Og það liggur alveg fyrir að hér er um enn eina málamiðlun af okkar hálfu að ræða. Því fari svo að þjóðin felli tillöguna leggst ekki nein athafnaskylda á ríkisstjórnina,“ segir Þorsteinn.

Slík niðurstaða myndi aðeins koma í veg fyrir að ríkisstjórnin gæti slitið viðræðunum.

„En hún getur látið umsóknina liggja á ís og það er þess vegna algerlega út í hött að pólitískur ómöguleiki komi upp verði sú tillaga felld í þjóðaratkvæði,“ segir Þorsteinn

Það bendi margt til að Bjarni hafi ekki lesið þessa málamiðlunartillögu sjálfstæðra evrópusinna, eda var hún ekki tekin fyrir á þingflokksfundi.

Lýsir það að þínu mati forherðingu eða hörku í málinu?

„Það er auðvitað ljóst að þessi tillaga um viðræðuslit er borin fram að kröfu mestu harðlínumanna í málinu,“ segir formaðurinn fyrrverandi.

Tillaga sjálfstæðra evrópusinna setji enga athafnaskyldu á ríkisstjórnina varðandi viðræður.

„Ég held að þegar um mál af þessu tagi er að ræða þar sem eru afar skiptar skoðanir sé afar óhyggilegt að láta þrengstu harðlínusjónarmið ráða för. Það sé skynsamlegra að hlusta á þá sem vilja einhverjar málamiðlanir og millileiðir,“ segir Þorsteinn Pálsson fyrrverandi formaður Sjálfstæðisflokksins.