Sakar Árna Pál um ógeðfellda pólitík

Sigmundur Davíð Gunnlaugsson forsætisráðherra sakaði Árna Pál Árnason formann Samfylkingarinnar um að stunda ómerkilega og ógeðfellda pólitík í MP-banka málinu.

Þetta kom fram í svari forsætisráðherra á Alþingi í dag. Árni Páll spurði ráðherra hvort hann hafi komið að þeirri ákvörðun að miða frískuldamark bankaskattsins við 50 miljarða en eins og fram hefur komið í fjölmiðlum lækkuðu skattgreiðslur bankans um 78 prósent útaf þessu eða um tæpar 200 milljónir.

Sigmundur sagðist ekki hafa vitað um frítekjumarkið fyrr en það var kynnt í þingflokkum og benti ennfremur á að Árni Páll hafi samþykkt þessar breytingar á frítekjumarkinu þegar það var til umfjöllunar í efnahags- og viðskiptanefnd.

„Ekki aðeins er háttvirtur þingmaður það ómerkilegur að fara að blanda ættingjum og samstarfsmönnum stjórnmálamanna inn í pólitískt skítkast til að reyna að koma á þá höggi heldur gerir hann það með því að dylgja um ákvörðun sem hann sjálfur kom beint að, ólíkt mér. Í þessu máli nær háttvirtur þingmaður nýjum botni í þeirri ógeðfelldu pólitík sem hann er farinn að stunda líklega til þess að verjast í vandræðum á sínum heimavígstöðvum í sínum flokki,“ sagði Sigmundur Davíð.

Árni Páll sagðist ekki ætla að elta ólar við fúkyrðaflaum forsætisráðherra.

„Það er ekki verið að dylgja um tengsl þegar þau eru raunverulega fyrir hendi og þegar þau eru raunverulega fyrir hendi ber stjórnvöldum skylda til þess að skýra aðkomu sína að málum til þess að við getum treyst því að það sé hafið yfir allan vafa að ákvarðanir séu teknar á efnislegum forsendum. Hinar efnislegu forsendur fyrir þessari ákvörðun vantar,“ sagði Árni Páll.