Mótmæla lágri framfærslu með Hungurleikum

Ungir jafnaðarmenn hafa brugðið á það ráð að standa fyrir hungurleikum til að mótmæla lágri framfærslu LÍN til námsmanna. Dæmi eru um að námsmenn leiti sér ekki læknisaðstoðar til að ná endum saman.

Margir kannast við bókaþríleikinn Hungurleikanna (e. Hunger Games) eftir bandaríska rithöfundinn Suzanne Collins. Bækurnar hafa síðar orðið að vinsælum Hollywood-bíómyndum. Ungir jafnaðarmenn virðast hafa fengið hugljómun við lestur bókanna því þeir hafa sett á laggirnar sína eigin hungurleika. Leikreglurnar eru einfaldar; lifa af í viku á námslánum Lánasjóðs íslenskra námsmanna.

„Það þarf lítið að gerast til að allt fari úr skorðum hjá námsmönnum. Við vitum af fólki sem hefur ekki sótt sér læknis- eða tannlæknaaðstoðar meðan það stundar nám vegna of mikils kostnaðar,“ segir Stefán Rafn Sigurbjörnsson, formaður ungra jafnaðarmanna.

„Það er ekkert mál að gera þetta í viku en þetta er þriggja ára háskólanám og ansi margt sem getur komið upp á þremur árum,“ segir Rósanna Andrésdóttir, alþjóðafulltrúi ungra jafnaðarmanna.

Námsmenn hafa um 1300 krónur til matarkaupa á dag. Greint var frá því í fréttum Rúv fyrir skömmu að sífellt fleiri námsmenn leituðu sér mataraðstoðar hjá mæðrastyrksnefnd.

Er ekki hægt að lifa sómasamlegu lífi fyrir 1300 krónur í matarpening á dag?

„Það er ágætt að hafa 1300 krónur í dag ef það fer eingöngu í matarkaup,“svarar Stefán. „Það var einn keppandi í hungurleikunum sem náði að eyðileggja eina skóparið sitt og þurfti að redda sér nýjum skóm. Þá gæti næstum því vikuframfærsla verið farin.“

Nánar í myndbandinu hér að ofan.