„Hún er í rauninni margfalt fórnarlamb“

„Hún er í rauninni margfalt fórnarlamb,“ segir Katrín Oddsdóttir lögmaður, um spænsku konuna sem dæmd var í 12 mánaða fangelsi fyrir að flytja inn kókaín þrátt fyrir að dómari tæki sögu hennar, að hún hafi verið neydd til verksins, trúanlega.

Konan sagði frá því að hún hafi verið neydd til þess að flytja inn um 433 grömm af kókaíni af tveimur mönnum frá Spáni. Mennirnir gengu meira að svo langt að troða pakkningum af kókaíni upp í leggöng hennar.

Athygli vakti að saga konunnar var tekin trúanleg, en samt var hún dæmd í 12 mánaða fangelsi. Í dómsorði var styrkleiki kókaínsins notaður til þess að ákvarða refsinguna.

Katrín segir mál af þessu tagi vera afar erfið. „Hún er neydd til þess að flytja efnin inn og í raun beitt ofbeldi við það að troða efnunum inn í líkama hennar. Ofan á þetta þarf hún að sitja inni heillengi. Hversu sanngjarnt er það?“

Katrín vill að löggjafinn bregðist við til að reyna að verja fólk sem lendir í svona aðstöðu. „Svona mál eru oft erfið. Ef svona athæfi verður gert refsilaust þá eykst hvatinn til þess að flytja efni inn á þennan hátt. Þetta er ekki alltaf svart og hvítt eða klippt og skorið. En í þessu máli virðst allir sammála um að taka sögu konunnar trúanlega. Þess vegna hefði mátt skoða einhverja aðra lausn. Því þarna er kona sem er beitt misbeitingu og nauðung, það getur eiginlega ekki orðið skýrara.“

Katrín bendir ennfremur á að áhugavert væri að skoða aðstæður í nágrannalöndunum og hvort þar fyrirfinnist betri vörn fyrir fórnarlömb í málum sem þessum.