Segir gagnrýni sína ekki lúta að tannslípun grísa

Sif Traustadóttir, formaður Dýraverndunarsambands Íslands, segir Hörð Harðarson, formann Svínaræktarfélags Íslands, líta framhjá megingagnrýni samtaka hennar á verksmiðjubúskap svína á Íslandi. Hörður hefur gagnrýnt Sif og sagt ummæli hennar sem dýralæknis lýsa vanþekkingu. Sif segir hins vegar að vandamálið sé ekki tannslípun grísa, eins og Hörður hafi haldið fram.

„Vandamálið felst í því að grísir hafa verið geltir og hali þeirra klipptur án deyfingar. Samkvæmt nýju lögunum um velferð dýra verður áfram leyfilegt að klippa hala og gelda grísi. Það er eðlilegt að grísir séu geltir til að koma í veg fyrir galtarbragð af kjötinu,“ segir Sif. Hún bætir þó við að þetta verði þó að gera í samræmi við nýju lögin.



„Þetta verður að gerast með deyfingu og verkjastillingu og það er það sem við viljum að sé fylgt eftir. Varðandi halann þá er það þannig að ef eðlislægum þörfum svína er sinnt þá þarf ekki að klippa halann á þeim af því að þá eru þau ekki að naga halann á hvoru öðru,“ segir Sif.

Svín ættu ekki að sólbrenna á Íslandi

Hörður hefur einnig sagt að svín séu húsdýr og að þau séu viðkvæm fyrir sól, því sé ekki endilega best fyrir þau að vera mikið úti við. Þau séu með þunna húð og brenni auðveldlega í sólinni. Sif segir auðvelt að koma í veg fyrir slíkt enda sé sólin ekki stórt vandamál hér á landi.

„Svín eru með gisnari feld heldur en önnur spendýr. Þau geta brunnið ef það er mikil og sterk sól en það má auðveldlega leysa með varnaraðgerðum. Þegar svín eru úti velta þau sér uppúr mold til að vernda húðina, auk þess er hægt að hafa skjól þannig að þau geti leitað í skugga í mikilli sól. Fyrir utan það þá er of mikil sól ekki teljandi vandamál hér á Íslandi. Svínin í húsdýragarðinum fara út á sumrin og ég hef aldrei heyrt um að þau hafi sólbrunnið.“

Reglur þarf yfirleitt til að bæta aðbúnað

Sif segist skilja málsstað formanns Svínaræktarfélagsins enda sé samkeppni á markaðnum hér á landi hörð. Hún segir vistvæna svínarækt hins vegar geta verið arðbæra fyrir þá aðila sem hafi áhuga á að reyna slíkt.



„Svínaræktin er þannig að það er rosaleg samkeppni og þess vegna þarf yfirleitt reglur til þess að breytingar verði til batnaðar. það eru örfáir svínabændur eftir á íslandi vegna þess að samþjöppun hefur orðið í greininni því búin eru að stækka og eigendur eru færri. Hér eru hinsvegar rosaleg sóknarfæri fyrir þá sem hafa áhuga á vistvænni ræktun, því fyrir þá vöru er hægt að fá hærra verð fyrir. Ég held að það sé hópur fólks sem myndi greiða hærra verð fyrir slíka vöru,“ segir Sif.