Hefði viljað klára málið fyrir dómstólum

Rúmlega áttræður karlmaður sem grunaður var um að hafa misnotað þroskaskerta stjúpdóttur sína kynferðislega í um 40 ára verður ekki ákærður. Saksóknari hefur fellt málið niður þar sem gögn málsins þóttu ekki nægjanleg til sakfellingar. RÚV sagði frá þessu í kvöldfréttum.

Brotin eru ýmist fyrnd eða að orð standi gegn orði.

Maðurinn var handtekinn í mars í fyrra og sat um tíma í gæsluvarðhaldi. Konan er nú um fimmtugt og grunur leikur á því að hann hafi misnotað hana frá því að hún var barn. Konan greindi frá því að maðurinn, tveir bræður hans sem nú eru látnir og tengdasonur sinn hefðu brotið gegn sér. Tengdasonurinn játaði brotin við yfirheyrslu og hefur verið ákærður og mál gegn honum er nú rekið fyrir Héraðsdómi Vesturlands.

María Magnúsdóttir, réttargæslumaður konunnar sagði í samtali við RÚV að það væru auðvitað ákveðin vonbrigði að svona hafi farið. Hún hefði viljað að málið yrði klárað fyrir dómstólum og fá niðurstöðuna þar.

Hún segir að málið hafi vakið sig til umhugsunar um stöðu fatlaðra einstaklinga sem og barna í kynferðisbrotum. Þau eigi kannski erfiðara með að koma orðum að hlutunum og muna dagsetningar og atburðarrásina. Þessir hópar eigi því erfiðara uppdráttar en aðrir í svona málum.

Tíðni ofbeldis meiri gangvart fötluðum en öðrum

„Það er full ástæða til þess að fræða þennan hóp borgara betur, ýmsir hópar fatlaðra eru einangraðri en aðrir,“ segir Guðrún Jónsdóttir, starfskona Stígamóta.

Stígamót ætla um  næstu helgi að auglýsa eftir manneskju í tilraunaverkefni til eins árs, sú mun fara inn í samfélag fatlaðra og veita fræðslu um ofbeldi. Það verður farið inn á vinnustaði, unnið með ýmsum hagsmunasamtökum og farið inn í félagsstarf fatlaðra.

„Það þarf að fara yfir fleiri þröskulda. Tíðni ofbeldis er hærri gagnvart fötluðum en öðrum,“ segir Guðrún.

Þetta sé verkefni sem þau hafi lengi langað til að fara af stað með. Stígamót eru nú að leita að stærra húsnæði sem hefur gott aðgengi fyrir fatlaða.