Umfjöllun: Danmörk - Ísland 0-0 | Allt opið í rimmunni við Dani

Leikur Danmerkur og Íslands var grútleiðinlegur en það skipti engu máli því íslenska liðið náði þeim úrslitum sem það ætlaði sér. Markalaust jafntefli í fyrri leiknum gegn sterku liði Dana og því er okkar lið í góðum möguleika í seinni leiknum.

Íslenska liðið hóf leikinn ágætlega en heimamenn tóku leikinn fljótlega yfir og hófu að þjarma að íslenska liðinu.

Lungi fyrri hálfleiks fór fram á vallarhelmingi íslenska liðsins en það var viðbúið. Það var líka allt í lagi því strákarnir vörðust fimlega og Danirnir sköpuðu lítið af færum.

Besta færi Dana kom seint í hálfleiknum er fyrrum leikmaður Stjörnunnar, Alexander Scholz, átti frábæra sendingu á Lasse Christensen en skot hans var lélegt og sigdli yfir markið.

Danir skoruðu rétt fyrir hlé en aukaspyrna dæmd á þá. Fyrir litlar sakir að því er virtist en við kvörtum ekki yfir því.

Strákarnir voru að sama skapi fljótir fram er þeir fengu tækifæri til þess að sækja hratt en færin voru af skornum skammti. Liðið var heldur ekki að ná að nýta föstu leikatriði sem skildi.

Engu að síður var gott að fara með 0-0 til búningsherbergja.

Danir héldu áfram að sækja í síðari hálfleik og íslenska liðið lá í skotgröfunum. Liðið sem fyrr að verjast vel en smá fát í að hreinsa frá en strákarnir sluppu með skrekkinn.

Danir reyndu að toga og teygja íslensku vörnina en með frekar takmörkuðum árangri. Þegar þeir reyndu síðan langskot þá voru þeir ekki nærri því að skora. Þetta var að spilast eins og íslenska liðið vildi.

Það dró svo úr sóknarþunganum eftir því sem leið á hálfleikinn. Danir áttu engin svör við varnarmúr íslenska liðsins.

Íslenska liðið hafði nákvæmlega engan áhuga á því að sækja. Oft var bara neglt fram án þess að athuga hvort það væri maður í blárri treyju á svæðinu. Maður myndi ætla að þetta lið gæti meira fram á við en þetta er víst 180 mínútna rimma.

Það var brjáluð vinnsla í íslenska liðinu í leiknum. Menn gríðarlega duglegir og fórnuðu sér í allt. Liðið mjög þétt og miðverðirnir líklega með hausverk eftir að hafa skallað alla þessa bolta í burtu.

Fyrri hálfleikur í rimmunni búinn og Íslandí fínni stöðu. Nú er það strákanna að sýna að þeir geti líka sótt gegn þessu danska liði.