Byggja 53 milljóna skála við hliðina á öðrum

„Þetta er fáránlega þröngt og ekki hægt að bjóða fólki upp á svona til lengdar,“ segir Hjörleifur Finnsson, þjóðgarðsvörður á norðursvæði Vatnajökulsþjóðgarðs. Starfsmenn hans hafa þurft að halda til í hjólhýsi við skála Ferðafélags Akureyrar í Öskju nærri Drekagili í Vatnajökulsþjóðgarði. Þetta hefur orðið til þess að ríkið hyggst reisa 100 fermetra skála á svæðinu en lægsta boð var 53 milljónir króna. Vonir standa til að framkvæmdir hefjist í haust og ljúki næsta sumar.

Töluverð kergja er hlaupin í samskipti þjóðgarðsins og Ferðafélags Akureyrar, sem á og rekur skála við hlið hjólhýsisins. Að sögn Hjörleifs sleit ferðafélagið samningum við þjóðgarðinn í janúar síðastliðnum en þá hafði verið samstarfssamningur milli þessara tveggja aðila um skála- og landvörslu. Þjóðgarðurinn leigði svo skála af ferðafélaginu fyrir tæpa eina og hálfa milljón yfir sumarið.

Upphaf deilunnar má meðal annars rekja til þess að ríkið var ósátt við að ferðafélagið héldi ekki úti verkbókhaldi eða vaktakerfi. „Það var að mínu frumkvæði að það var komið á vaktakerfi og verkbókhaldi svo það væri hægt að fylgja því eftir að hvor aðili væri að fá það sem þeir borguðu fyrir,“ útskýrir Hjörleifur. Hann segir að eftir að samningum var slitið hafi hann óskað eftir því að skálinn yrði leigður fyrir landverði. Því var hafnað.

„Mér finnst þetta bara dálítið leiðinlegt,“ svarar Hjörleifur spurður út í hans álit á málinu og bætir við: „Ferðafélagið hefur gert margt gott en ég átta mig ekki á þessum viðbrögðum.“

Hilmar Antonsson, formaður Ferðafélags Akureyrar, segir að það væri ákjósanlegra að samstarf væri þarna á milli. „En það voru praktísk atriði sem gengu ekki upp,“ segir Hilmar. Honum líst ekki á hugmyndina um byggingu nýs skála við hlið þess gamla.

„Þetta er bara sóun á almannafé,“ segir Hilmar en áréttar að honum finnist bygging skálans ekki aðalatriði. „Stærsta málið er viðhald og þjónusta. Við höfum rekið okkar hús með óhemjumikilli sjálfboðavinnu,“ segir Hilmar og bætir við að hluti af deilunni hafi verið vinnutími. Hilmar segir sitt starfsfólk vinna langt fram eftir en að ríkisstarfsmenn hætti fyrr á daginn. Það er meðal annars ástæðan fyrir því að landverðirnir hafi ekki fengið inn í skálann: „Það yrði bara vont fyrir móralinn. Það passar ekkert að okkar fólk, sem er að vinna langt fram eftir, sé í sama húsi og þeir sem eru að klára klukkan fimm eða sex á daginn.“