Kryfur lík á milli leikjanna

 „Þetta var fullkominn dagur og alveg geggjað. Framararnir eru auðvitað með fínt lið og þetta var kærkominn sigur. Markið gerði þetta auðvitað hrikalega sætt,“ segir Kristján Hauksson, leikmaður Fylkis.

Miðvörðurinn skoraði eitt marka Árbæjarliðsins sem vann afar sannfærandi sigur á Fram í 13. umferð Pepsi-deildarinnar. Kristján er leikmaður umferðarinnar að mati Fréttablaðsins og náði blaðamaður tali af honum þar sem hann sinnti sínu daglega sumarstarfi, að kryfja lík á Meinafræðideild Landspítalans.

Að lokinni fyrri umferð Íslandsmótsins var Fylkir með fjögur stig og hafði ekki tapað leik. Nú hafa Valur og Fram fengið að kenna á Árbæingum í síðustu leikjum og Fylkir kominn í betri mál með tíu stig.

„Við hefðum getað kroppað í fleiri stig í fyrri umferðinni. Við vorum ekki það lélegir að við ættum bara að vera með fjögur sig,“ segir Kristján. Ásgeir Börkur Ásgeirsson, miðjumaðurinn grjótharði, sneri heim í Árbæinn fyrir leikina tvo og hafa margir tengt gott gengi Fylkis við komu hans.

Við erum ekkert sloppnir

„Það er erfitt að útskýra áhrifin sem Börkurinn hefur bæði inni í klefa og úti á velli. Allir fengu meiri trú og eru að finna sig betur,“ segir Kristján. Hann hrósar einnig Andrési Má Jóhannessyni í hástert en minnir á að enn sé mikil vinna fyrir höndum.

„Við erum ekkert sloppnir. Þetta verður fjögurra eða fimm liða mót þarna neðst fram í síðasta leik,“ segir Kristján. Gott markmið Árbæinga sé að vinna það mót.

Það vakti athygli í mars þegar fréttist að Kristján væri á leið burtu frá uppeldisfélagi sínu Fram. Í kjölfarið tilkynnti miðvörðurinn 27 ára að hann hygðist leggja skóna á hilluna.

Yfirgaf Fram ekki í illu

„Ég tók viku eða tíu daga til að ákveða þetta. Svo eina helgina, þegar það voru leikir í gangi, fékk ég á tilfinninguna að ég væri ekki tilbúinn að hætta strax. Ég fór að sakna boltans og fannst leiðinlegt að hætta svona,“ segir Kristján.

Það færist í vöxt að knattspyrnumenn kjósi að fagna ekki mörkum sem þeir skora gegn fyrrverandi félögum sínum. Allir áhorfendur í Lautinni á sunnudag geta staðfest að sú hugsun kom aldrei upp í kollinn hjá Kristjáni.

„Ég fór svo sem ekkert í neinu illu frá Fram. Þeir virtust bara ekki hafa not fyrir mig,“ segir Kristján. Hann veltir fyrir sér hvort hann hefði fagnað hefðu viðskilnaðurinn við Fram verið á öðrum nótum, t.d. ef hann hefði haft frumkvæðið að honum.

„Þá hefði maður kannski ekki tekið alveg sama pakka. Mér finnst að menn eigi að fagna mörkum, sérstaklega ef menn skora svona sjaldan.“

Miðvörðurinn hefur ekki tekið ákvörðun um það hvort hann haldi áfram að lokinni yfirstandandi leiktíð. Koma verði í ljós hvort hann hafi orku og tíma í fótboltann.