Kaupmenn sofa til hádegis og missa viðskipti

Kaupmaður við Laugaveg segir verslanir þar opna allt of seint og verði þar af leiðandi af miklum viðskiptum. Þá ráfi ferðamenn um þessa aðalverslunargötu borgarinnar án þess að fá fullnægjandi þjónustu.

Tugir og jafnvel hundruð þúsunda ferðamanna heimsækja höfuðborgina á hverju ári og hafa margir hverjir skamma viðdvöl, hvort sem þeir koma með skemmtiferðaskipum eða flugi. Hildur Símonardóttir kaupmaður í Vinnufatabúðinni við Laugaveg og stjórnarmaður í Samtökum kaupmanna og fasteigna við Laugaveg segir ferðamenn árrisula en þeir komi nánast alls staðar að lokuðum dyrum verslana við aðalverslunargötu borgarinnar fyrir hádegi.

„Það eru flestir með lokað og opna ekki fyrr en klukkan ellefu eða tólf að deginum. Ég held að það séu fjórir eða fimm aðilar sem opna klukkan níu, við (Vinnufatabúðin) opnum klukkan níu, Brynja opnar og Guðsteinn og ég held að Gilbert opni enn klukkan níu,“ segir Hildur.

Þetta sé sérstaklega bagalegt með verslanir hönnuða en ferðamenn sæki eðlilega í verslanir þeirra. „Túristar hafa bara þrjá til fjóra tíma í stoppi. Síðan eru þeir farnir í ferðir og koma svo að lokuðum dyrum þegar þeir koma í bæinn aftur, hvort sem þeir ferðast með skipum eða flugi.  Þetta er tímaskekkja,“ segir Hildur.

En á meðan ferðamenn af skemmtiferðaskipum séu í alls kyns ferðum séu þúsundir starfsmanna skipanna í borginni og vilji versla. Það skjóti því skökku við í höfuðborginni séu verslanir meira og minna lokaðar til hádegis.

„Þannig að þetta er fáránlegt. Þetta fólk myndi eflaust koma beint niður í miðbæ ef yrði opnað fyrr. Síðan má ekki gleyma fólki sem er í vaktavinnu, fólk sem vill kaupa afmælisgjafir og þess háttar, það kemur að lokuðum dyrum. Það er kominn dagur þegar klukkan er orðin ellefu eða tólf. Þetta er bara bull,“ segir Hildur.

Hildur segir eldri verslunareigendur opna um klukkan níu en þeir yngri ekki fyrr en undir hádegi.

„Við getum farið í svona Siesta milli klukkan tvö og þrjú eins og suðrænar þjóðir gera. Þetta eru auðvitað allt einyrkjar sem ráða sér sjálfir. En ef fólk vill gera betur og fá meira inn í kassann verður það að standa vaktina,“ segir Hildur Símonardóttir kaupmaður við Laugarveginn.