Best í heimi í barnsfæðingum

Ástand mála í barnsfæðingum er hvergi betra en á Íslandi, að því er fram kemur í skýrslu Efnahags- og framfarastofnunarinnar, OECD, um heilbrigðismál sem kom út í gær. Úttektin í skýrslunni tekur til 34 aðildarríkja stofnunarinnar allt fram til ársins 2011, en þar má finna margvíslegar upplýsingar um heilbrigðismál.

Í skýrslunni sést meðal annars að tíðni ungbarnadauða er lægst á Íslandi, sem svarar 1,6 andlátum á fyrsta ári á hver 1.000 lifandi börn, en auk þess eru börn með lága fæðingarþyngd, undir 2.500 grömmum, líka hlutfallslega fæst hér á landi, eða 3,2 börn á hver 1.000. Til samanburðar er meðaltal OECD-landanna annars vegar 4,1 í ungbarnadauða og hins vegar 6,8 börn sem fæðast innan við 2.500 grömm að þyngd.

Síðustu ár hefur ungbarnadauði verið á hröðu undanhaldi í OECD-ríkjunum en hlutfall barna sem fæðast of létt hefur aukist lítillega.

Þá vekur líka athygli að hvergi er gripið sjaldnar til keisaraskurðar við fæðingu en einmitt á Íslandi þar sem 14,7% barna fæðast með þeim hætti, samanborið við 27% meðaltal í OECD og allt upp í tæpan helming barna í Tyrklandi og Mexíkó.

Þessu tengt, kemur einnig fram í skýrslunni að ljósmæður eru hvergi fleiri en einmitt hér á landi, en hér eru 175 ljósmæður á hverja 100.000 borgara samanborið við OECD-meðaltalið sem er 70 ljósmæður.

Anna Eðvaldsdóttir, varaformaður Ljósmæðrafélags Íslands, segir að ekki komi á óvart að Ísland komi svo vel út úr samanburðinum, þar sem allt utanumhald um barneignir hér á landi er eins og best verður á kosið.

„Við sem komum að þessum málum vinnum öll mjög vel saman og á faglegan hátt,“ segir hún.

„Þetta hefur lengi verið í góðum málum hjá okkur. Sérstaklega hvað varðar heimaþjónustuna sem ég held að sé hvergi í heiminum betri en hérna.“

Þá segir Anna að í eftirfylgni með nýburum sé samstarf afar gott milli allra aðila og kerfið þétt þar sem auðvelt er að fá börn lögð inn ef eitthvað kemur upp á. „Svo er mun meiri eftirfylgni í kerfinu sem skilar sér í því að sjaldnar þarf að grípa til keisaraskurða en hér á árum áður.“

Anna segir loks að íslenskar ljósmæður hafi verið afar fljótar að tileinka sér margs konar nýjungar síðustu tuttugu árin. Til dæmis nudd og nálastungur, sem hafi reynst afar vel.