Tæplega sjötugur ökufantur ákærður fyrir kappakstur

Tveir menn eru ákærðir fyrir umferðar- og hegningarlagabrot vegna kappaksturs sem þeir þreyttu á Hafnarfjarðarvegi. Málið var þingfest í Héraðsdómi Reykjaness á fimmtudaginn. Annar mannanna var 67 ára gamall þegar kappaksturinn átti sér stað. Sá yngri er á þrítugsaldri.

Það var í september árið 2011 sem mennirnir þreyttu kappakstur norður Hafnarfjarðarveg að Fífuhvammsvegi við Kópavogslæk í Kópavogi. Mennirnir óku á allt að 174 kílómetra hraða á klukkustund en mögulegur hámarkshraði bifreiðanna var 189 kílómetra hraði samkvæmt ákæruskjali. Hámarkshraði á svæðinu er aftur á móti 80 kílómetrar á klukkustund.

Sá eldri er að auki ákærður fyrir að hafa ekið undir áhrifum sljóvgandi og deyfandi lyfja, auk þess sem hann var ekki í bílbelti.

Kappaksturinn endaði með því að sá eldri missti stjórn á bifreiðinni, sem var 340 hestafla svartur Dodge Charger-bíll. Bifreiðin rann með hliðarskriði, rakst í kjölfarið á ljósastaur og fór í loftköstum um 120 metra leið. Bifreiðin hafnaði loks utan vegar nærri Kópavogslæk eftir ítrekaðar veltur.

Mikið var fjallað um kappaksturinn í fjölmiðlum þegar málið kom upp. Þá vakti athygli að leigubílstjóri náði ótrúlegu myndbandi af bílveltunni en mikil umferð var á vegarkaflanum þennan dag.

Ökumaðurinn slapp hreint út sagt ótrúlega vel að mati kunnugra enda ekki í bílbelti. Smáhundur mannsins, sem var með í bílnum, var þó ekki jafn heppinn. Sá drapst.

Fréttablaðið fjallaði um akstur mannsins en þar kom fram að þetta hefði ekki verið í fyrsta skiptið sem hann hefði keppt í ólöglegum kappakstri.

Spjallverjar samtakanna Live2Cruize voru þá misánægðir með þann roskna. „Þessi gaur reyndi að keyra í hliðina á mér eftir að hann tapaði fyrir mér í spyrnu eitt sinn og svo þegar að við stoppuðum á næstu ljósum þá rétti hann mér bara puttann,“ sagði einn.

Í ákæruskjalinu segir orðrétt um atburðinn: „Ákærðu röskuðu […] umferðaröryggi á alfaraleið og stofnuðu á ófyrirleitinn hátt lífi og heilsu vegfarenda í augljósan háska.“

Málinu var frestað samkvæmt upplýsingum frá ríkissaksóknara sem sækir málið og því liggur afstaða mannanna gagnvart ákæruatriðunum ekki fyrir. Þess er að auki krafist að mennirnir verði sviptir ökuréttindum.