Kærður fyrir að aka á björgunarsveitarmann á menningarnótt

Ekið var á björgunarsveitarmann á menningarnótt af ökumanni sem var ósáttur við að komast ekki leiðar sinnar vegna lokaðra gatna.

Atvikið átti sér stað um miðjan dag á horni Garðastrætis og Vesturgötu með þeim afleiðingum að björgunarsveitarmaðurinn þurfti að leita á slysadeild vegna áverka. Kallað var til lögreglu og mun málið vera í eðlilegum farvegi.



Daníel Eyþór Gunnlaugsson, fulltrúi svæðisstjórnar björgunarsveita höfuðborgarsvæðisins, segir þetta í fjórða skiptið á undanförnum árum sem ekið er á á björgunarsveitarmann við störf sín á menningarnótt.

„Því miður hefur það gerst að fólk virðir ekki þær lokanir sem við stöndum í. Í þessu tilviki var ökumaður á miðjum aldri ósáttur við okkar störf og ók beint framan á björgunarsveitarmann sem stóð við vegahindrun á meðan annar björgunarsveitarmaður stóð og ræddi við ökumanninn við bílinn. Kallað var til lögreglu en til marks um óskammfeilni ökumannanna snéri farþegi bifreiðarinnar síðar á staðinn og hélt áfram að ausa úr skálum reiði sinnar við björgunarsveitafólk.“



Daníel Eyþór segir atkvikið ekki kalla á breytt vinnubrögð björgunarsveita sem starfi í umboði lögreglu þessa nótt. „Við lítum málið alvarlegum augum og það er ágætt að fólk hafi það í huga að þetta er sama fólkið og leggur í sig í mikla hættu í björgunaraðgerðum allt árið um kring.“