Semja við Breta um arnfirskt hafkalk

Fyrirtækið Hafkalk á Bíldudal, sem framleiðir fæðubótaefni úr kalkþörungum, er við það að ná samningum við bresk fyrirtæki um útflutning og dreifingu á fæðubótarefnum á Bretlandi.

Jörundur Garðarsson, stofnandi fyrirtækisins, segist vonast til þess að hægt verði að hefja útflutning á næstu mánuðum. Á síðasta ári seldi Hafkalk um 50 þúsund box hér innanlands en ef samningar nást við Breta er hugsanlegt að umfangið jafnvel fjórfaldist, segir hann.

Tveir starfa í fyrirtækinu ásamt Jörundi, en hann segir að ef hafist verður handa við útflutning þurfi vissulega að bæta við vinnandi höndum.

Auk þess að framleiða fæðubótarefnið Hafkalk, sem styrkir aðallega brjósk og bein, býður fyrirtækið upp á töflur sem hjálpa fólki að slaka á, og töflur sem eru ríkar af Omega þrjú-fitusýrum.

Kalkþörungaverksmiðja tók til starfa á Bíldudal árið 2007 og sá Jörundur tækifærin samfara því. Hann kom Hafkalki á koppinn árið 2009. Fyrirtækið er einnig söluaðili hér innanlands fyrir steinefnafóður og jarðvegsbætiefni sem framleitt er í verksmiðjunni.

Meðal fyrstu kúnna til að kaupa steinefnafóður var Jónatan Magnússon, bóndi á Hóli í Önundarfirði. Hann segir efnið mikilvægt heilsufari kúa. „Ég lenti í því að steinefnafóðrið kláraðist hjá mér og það leið ekki nema vika þar til kýrnar voru komnar með doða og voru ósköp ólíkar sjálfum sér,“ segir hann. Hann segir einnig að steinefnafóðrið jafni sýrustig í vömb og að það auki prótein í mjólk. „Ef við einföldum þetta þá má segja að þetta slái á nábítinn hjá þeim,“ segir hann kankvís.



Jörundur segir að hann hafi reynt að selja knattspyrnufélögum jarðvegsbætiefnið þar sem það hindrar mosavöxt og geri grasi gott. „En það virðist vera erfitt að breyta einhverri hefð í þeim efnum, hins vegar hafa nokkur sveitarfélög notað þetta á sína garða og tún með góðum árangri,“ segir hann.