Eitrað inngrip í dýrmætt mýrlendi

Skógrækt ríkisins hefur gengið harkalega að dýrmætu votlendissvæði sem Votlendisnefnd ásamt Náttúrustofnun Íslands hefur unnið að því að endurheimta síðan árið 1996.

Dagmálatjörn í Biskupstungum var fyrsta tjörnin sem endurheimt var í tilraunaverkefni Votlendisnefndar, en hún hafði það hlutverk að endurheimta mýrlendi sem þurrkað hafði verið upp, og tókst aðgerðin vel að mati aðstandenda.

Nú, fimmtán árum síðar leiðir vettvangsrannsókn í ljós að eitrað hefur verið fyrir kjarr- og mýrlendisgróðri á stóru svæði austan tjarnarinnar og sitkagreni plantað í landið. Náttúrufræðistofnun Íslands kallar þetta hernað gegn landinu.

„Ég set spurningarmerki við það að vera að rækta skóga í mýrlendi. Mýrarnar eru einhver sterkustu og öflugustu vistkerfi sem við eigum hér á landi,“ segir Borgþór Magnússon, plöntuvistfræðingur og formaður vistfræðideildar hjá Náttúrustofnun Íslands. Hann segir að varlega verði að fara í aðgerðir af þessu tagi.

„Ég tók eftir því að það var búið að úða eitri á mýrarsvæði við tjörnina. Mér fannst þetta nokkuð harkalega fram gengið í skógræktinni, að vera að eyða þessum náttúrulega gróðri til þess að ryðja fyrir skógi alveg þarna á tjarnarbakkanum.“

Skógræktin sem um ræðir er hluti af landshlutaverkefni í skógrækt, nánar tiltekið Suðurlandsskógaverkefni. „Jarðirnar eru teknar út, gróðurfar þeirra metið og valið það land sem er talið henta best til skógræktar. Svo velja þeir væntanlega trjátegundir með tilliti til skilyrða landsins,“ útskýrir Borgþór.

Að mati Náttúrustofnunar geti skógrækt af þessu tagi varla verið talin fara fram í sátt við umhverfið en það er leiðbeiningarregla skógræktarinnar.

„Það hefði verið æskilegt að svæðið hefði fengið að njóta sín án mikils rasks. Þarna fara af stað aðgerðir alveg inn á svæðið, manni finnst þetta rekast saman og menn ekki taka tillit til þess sem var.“

Borgþór leggur áherslu á mikilvægi aðgerða sem stefna að því að endurheimta votlendi þar sem að með því sé hægt að draga mikið úr gróðurhúsaáhrifum. „Jafnframt eru þessar aðgerðir til þess fallnar að koma náttúrunni nær því að vera í upprunalegu horfi. Ríkið er að greiða fyrir því að raska þeim enn frekar.“

Ekki náðist í forsvarsmann Suðurlandskógaverkefnis á vegum Skógræktar ríkisins við gerð fréttarinnar.