Rannsaka hvort vegagerð var ástæða síldardauðans

umhverfismálSérfræðingar Vegagerðarinnar og Hafrannsóknastofnunar eru að hefja rannsókn á því hvort þverun Kolgrafafjarðar hafi átt þátt í síldardauðanum í firðinum. Rannsóknin er viðamikil og gæti tekið allt að því eitt ár.

Jón Helgason, framkvæmdastjóri hjá Vegagerðinni, segir að vangaveltur um súrefnisþurrð sem aðalástæðu síldardauðans séu tilefni rannsóknarinnar og þá samband við vegfyllinguna í firðinum í því samhengi. „Það er ekkert einsýnt í þessum efnum en í samstarfi við Hafrannsóknastofnun erum við að skipuleggja frekari mælingar en þegar hafa verið gerðar vegna síldardauðans. Tilgangur þeirra er að greina nánar þessa tilgátu um það sem er að gerast fyrir innan þverunina,“ segir Jón.

Jón segir að mælingarnar séu umfangsmiklar og kostnaðarsamar ef allt verður framkvæmt sem rætt hefur verið um. Tímaramminn liggur ekki fyrir en rannsóknir gætu staðið í eitt ár ef nauðsynlegt þykir. „Fyrst er að safna upplýsingunum og greina svo þessar tilgátur sem uppi eru.“

Guðmundur Óskarsson, sérfræðingur á nytjastofnasviði Hafrannsóknastofnunar, fjallaði um síldardauðann í Kolgrafafirði á vegum Líffræðistofu Háskóla Íslands á dögunum. Þar staðfesti hann kenningar um síldardauðann; að hann séu rakinn til súrefnisskorts. Í máli hans kom fram að meginhluti íslenska sumargotssíldarstofnsins hefur haft vetursetu víðs vegar í sunnanverðum Breiðafirði frá haustinu 2006.

Veturinn 2011/2012 varð síldarinnar fyrst vart í verulega magni innan brúar í Kolgrafafirði og aftur í desember 2012, eða samkvæmt bergmálsmælingum um 300 þúsund tonn í hvoru tilviki. Aðeins tveimur dögum eftir að bergmálsmæling á stofninum fór fram, eða þann 14. desember 2012, varð ljóst að mikill síldardauði hafði átt sér stað í innanverðum firðinum. Viðlíka síldardauði átt sér svo aftur stað 1. febrúar 2013. Þegar allt er talið mun ríflega 50 þúsund tonn hafa drepist í þessi tvö skipti.