Ákall um að útrýma ofbeldi

„Við trúum því að hægt sé að byggja upp samfélag virðingar og jafnréttis, þar sem ofbeldi fær ekki þrifist," segir í bæklingi sem borinn var út í hús landsmanna í gær um vitundarvakningu ríkisins um kynferðisofbeldi gegn börnum.

Í bæklingnum er ákall til allra fullorðinna landsmanna um að taka þátt í að útrýma kynferðisofbeldi gegn börnum. „Kynferðisofbeldi á sér yfirleitt stað fyrir luktum dyrum. Það getur haft úrslitaáhrif í lífi barns að við sem erum fullorðin tökum eftir og bregðumst rétt við."

Þau Jóhanna Sigurðardóttir forsætisráðherra, Katrín Jakobsdóttir, mennta- og menningarmálaráðherra, Guðbjartur Hannesson velferðarráðherra og Ögmundur Jónasson innanríkisráðherra skrifa öll undir í bæklingnum, sem ber heitið „Það gæti verið þú sem hjálpar".

Átakið er hluti af viðbót við nýja aðalnámskrá leik-, grunn- og framhaldsskóla landsins og er markmiðið að fræða börn og starfsfólk grunnskóla um eðli og afleiðingar kynferðislegs ofbeldis og að allir skólar séu í stakk búnir til að bregðast við.