Sýning náttúruminja árið 2014

Grunnsýning Náttúruminjasafns Íslands verður opnuð í Perlunni haustið 2014. Það var staðfest með undirritun leigusamnings á aðstöðu í Perlunni í gær. Leigusamningurinn er til fimmtán ára og ársleigan er áttatíu milljónir króna.

Efnt verður til samkeppni um hönnun grunnsýningarinnar í húsinu á næstunni. Eins er ráðning nýs forstöðumanns við safnið fram undan, sem mun leiða mótun sýningarinnar og starfsemi safnsins næstu árin.

Uppbygging grunnsýningar Náttúruminjasafnsins er liður í fjárfestingaáætlun ríkisstjórnarinnar og er gert ráð fyrir að 500 milljónum króna verði varið til hönnunar og uppsetningar á sýningunni og mótun aðstöðu fyrir safnið í Perlunni.

Í tilkynningu segir að sýningunni sé ætlað að auka vitund landsmanna um náttúru Íslands, vera mikilvæg fyrir náttúrufræðikennslu á öllum skólastigum og veita aðgang að því mikla fræðsluefni sem er í öðrum vísindastofnunum, náttúruminjasöfnum, náttúrustofum og þjóðgörðum landsins. Þá er ótalið mikilvægi slíkrar sýningar í ferðaþjónustu.