Nýting háhitasvæða áfram í sama farvegi

HS Orka hefur ekki tekið neinar stefnumótandi ákvarðanir í ljósi erfiðleika í rekstri Hellisheiðarvirkjunar. Forstjóri Landsvirkjunar segir það hafa verið rétta stefnu að hægja á nýtingaráformum á háhitasvæðum á Norðausturlandi.

Júlíus Jónsson, forstjóri HS Orku, segir að fréttirnar frá Hellisheiðarvirkjun hafi ekki orðið til þess að fyrirtækið hafi íhugað að breyta áherslum. „Hins vegar er nýting háhita verkefni þar sem menn verða að læra af reynslunni. Við erum að þreifa okkur áfram með niðurdælingu og fleira sem lýtur að því hvernig best er að nýta háhitasvæðin. En það hafa engar stefnumótandi ákvarðanir verið teknar,“ segir Júlíus.

Á undanförnum dögum hafa málsmetandi menn sett fram þá skoðun að nógu langt hafi þegar verið gengið við nýtingu háhitasvæða, ekki síst á Reykjanesi. Á teikniborði HS Orku eru virkjanir í Eldvörpum, Krýsuvík og stækkun Reykjanesvirkjunar.

„Ég veit ekki alveg hvernig þeir vita það. Ég er ekki að segja að þeir hafi rangt fyrir sér, þetta er eitthvað sem enginn veit. Þeir vita þá meira en okkar sérfræðingar sem vinna við að rannsaka og mæla á svæðinu,“ segir Júlíus, inntur um efasemdaraddir um nýtingu á Reykjanesi. Um hvort frekari rannsóknir séu ekki nauðsynlegar segir Júlíus að svæðin séu stöðugt til rannsóknar, en vill ekkert fullyrða um hvort reynslan frá Hellisheiði seinki eða breyti áformum um nýtingu háhitasvæða fyrirtækisins.

Hörður Arnarson, forstjóri Landsvirkjunar, segir að fyrirtækið hafi þegar breytt nálgun við uppbyggingu háhitasvæða.

„Það er um eitt og hálft ár síðan við tilkynntum að á Norðausturlandi yrði farið í varfærna áfangauppbyggingu. Þar var áður stefnt á að virkja svæðin í einni atrennu, vegna eins stórnotanda á Bakka, en við féllum frá því. Við höfum því horft til reynslu annars staðar frá og erum að nýta hana,“ segir Hörður.

Landsvirkjun hefur áform um uppbyggingu tveggja 45 megavatta áfanga við virkjun í Bjarnarflagi, auk 90 megavatta virkjunar á Þeistareykjum. Virkjun í Bjarnarflagi hefur verið mikið til umræðu vegna nálægðar við Mývatn, en Landsvirkjun lætur nú vinna úttekt á gildandi umhverfismati virkjunarinnar.

Hörður segir mikilvægt að stíga varlega til jarðar við nýtingu háhita, og það hafi Landsvirkjun þegar tileinkað sér. „Þetta er auðvitað allt önnur nálgun en var á Hellisheiðinni,“ segir Hörður.