Nasri ætlar að berjast fyrir sæti sínu

Umboðsmaður franska miðjumannsins Samir Nasri hjá Manchester City segir leikmanninn ætla að berjast fyrir sæti sínu hjá liðinu þó hann hafi aðeins byrjað helming leikja liðsins á leiktíðinni.

Roberto Mancini knattspyrnustjóri City hefur gagnrýnt Nasri opinberlega fyrir slaka frammistöðu á tímabilinu. Nasri hefur átt erfitt uppdráttar eftir erfiðleika á Evrópumeistaramóti landsliða í sumar þar sem honum lenti saman við blaðamann og fékk þriggja leikja bann hjá franska knattspyrnusambandinu.

Umboðsmaður Nasri, Jean-Pierre Bernes, hefur fulla trú á sínum manni og spáir því að hann muni ná sér á strik á ný innan tíðar.

„Við getum ekki verið fordæmdir endalaust vegna vandræða með einn blaðamann,“ sagði umboðsmaðurinn við franska blaðið L´Equipe.

„Annars hef ég engar áhyggjur. Samir hefur ekki tapað hæfileikum sínum, það vita allir. Sjáðu bara Ribery. Fyrir tveimur árum vildu allir henda honum í burtu. Í dag er er Franck franska landsliðið og stjarna hjá Bayern vegna þess að hann lagði mikið á sig og það er sú leið sem Simir verður að fara, hann veit það og hann mun berjast fyrir sínu,“ sagði Bernes að lokum.