Datt niður í sandsíló þegar hann reyndi að hitta Fjallabræður

Nokkur ölvun var á Ísafirði í nótt en þar stendur yfir tónlistarhátíðin Aldrei fór ég suður. Skemmtanahald fór þó vel fram að sögn lögreglu og engin alvarleg atvik komu upp. Eitthvað var um smá pústra milli manna og þá fengu þrír að gista fangageymslur eftir að gleðskapur í heimahúsi fór úr böndunum.

Björgunarsveitir frá Ísafirði og Hnífsdal voru kallaðar út í nótt til að aðstoða sjúkralið við að ná manni upp úr sandsílói við steypustöðina í bænum. Hafði hann fallið um fimm metra ofan í gryfjuna. Verkið reyndist nokkuð umfangsmikið og töluverðan búnað þurfti til að hægt væri að síga niður í sílóið þar sem búið var um manninn. Þegar kom að því að hífa hann upp fyrir brúnina þurfti aðstoð kranabíls. Verkið tók því hátt í tvo tíma og tóku um tuttugu björgunarsveitarmenn þátt.

Maðurinn, sem var gestur á hátíðinni Aldrei fór ég suður, gaf þær upplýsingar um ferðir sínar að hann hann hafi verið að leita leiðar að bakdyrum tónleikastaðarins þegar hann féll. Ætlaði hann að reyna að hitta á Fjallabræður baksviðs og fá eiginhandaráritun.

Fjallabræður voru á sviði á Ísafirði um klukkan 22:00 í gærkvöldi en maðurinn rankaði við sér og hringdi eftir aðstoð á fjórða tímanum í nótt. Hann hefur því legið í töluverðan tíma í sílóinu. Þegar komið var að reyndist hann töluvert hruflaður eftir fallið en óbrotinn.