Jóhannes Gunnarsson: Ámælisvert að farfuglar fái óáreittir að fljúga til landsins

Jóhannes Gunnarsson, formaður Neytendasamtakanna, segir í pistli á heimasíðu samtakanna að bréf Eftirlitsstofnunar EFTA til íslenskra stjórnvalda um að bann á innflutningi á hráu og ófrosnu kjöti standist ekki reglur, ekki koma sér á óvart. Íslensk stjórnvöld hafa mótmælt þessum og sent rökstuðning til ESA þar sem sjónarmiðum þeirra er haldið til haga.

Jóhannes skrifar: „Ekki er fjallað um hættuna af hráu kjöti í þessum rökstuðningi. Það verður því að segjast eins og er að þessi rökstuðningur virkar ekki mjög sannfærandi á undirritaðan frekar en þá sem fara með þetta mál hjá ESA."

Jóhannes bætir svo við:

„Fyrir um 5 árum síðan stóð til að heimila innflutning á hráu kjöti með samþykkt nýrra matvælalaga. Þáverandi yfirdýralæknir, Halldór Runólfsson, sagði þá í fjölmiðlum að þeir dýrasjúkdómar sem borist hefðu til landsins á síðustu árum hefðu borist með fólki en ekki með matvælum eða dýrum. Halldór sagði einnig að aðrar þjóðir væru ekki síður hræddar við að sjúkdómar gætu borist milli svæða og landa með matvælum og því hafi ESB samþykkt umfangsmikla löggjöf og eftirlitskerfi til að koma í veg fyrir slíkt."

Jóhannes segir raunar að miðað við ummæli fyrrverandi dýralæknis væri nær lagi að allir þeir einstaklingar sem til landsins koma væru settir í sóttkví þar sem þeir gætu borið með sér salmónellu- og saurgerlastofna sem aldrei hafa fundist hér.

„Á sama hátt hlýtur það að vera mjög ámælisvert að farfuglar fái óáreittir að koma til landsins. Ef hættan er svo mikil af hráu kjöti að loka verði landinu fyrir innflutningi á slíku kjöti þá skulum við ganga alla leið og fyrirbyggja smit sem getur borist í bústofn landsmanna á mun auðveldari hátt en með hráu kjöti," skrifar Jóhannes svo.

Grein Jóhannesar í heild sinni má lesa hér.