Eldar kvikna enn í Ástralíu

Óttast er að nokkrir kjarr- og skógareldar sem nú loga í Nýja Suður Wales fylki í Ástralíu séu við það að renna saman í einn risastóran eld. Fjöldi slökkviliðsmanna hefur síðastliðna daga barist við eldana en veðurspár gera nú ráð fyrir enn meiri hita og þurrki sem lofar ekki góðu fyrir slökkvistarfið.

Síðastliðinn september var sá heitasti í manna minnum og hitabylgjan hefur haldið áfram í október. Slökkviliðsstjórinn á svæðinu sagði á blaðamannafundi í morgun að nú logi fimmtíu og átta eldar og eru fjórtán þeirra algjörlega stjórnlausir en slökkviliðsmenn hafa tök á hinum.