Framsókn vildi ekki Landspítala

Allt útlit var fyrir að þingstörfum mundi ljúka í gær í eins mikilli sátt og hægt var, miðað við deilur undanfarinnar daga. Samningar náðust daginn áður á milli formanna flokkanna um þingfrestun. Undir kvöldmat hljóp hins vegar snurða á þráðinn þegar Framsóknarflokkurinn neitaði að afgreiða lög um byggingu nýs Landspítala.

Þingfundi var frestað ítrekað en á níunda tímanum í gærkvöldi náðust samningar þegar Framsókn gaf eftir í spítalamálinu. Samið var um samþykkt náttúruverndarlaga með gildistíma frá 1. apríl 2014, fjölmiðlanefnd fær að íhlutast um takmarkanir á eignarhaldi á fjölmiðlum og breytingarákvæði á stjórnarskrá var samþykkt. Þingfundur stóð enn þegar Fréttablaðið fór í prentun í gær en til stóð að ljúka störfum síðar um kvöldið.