Neikvæðnin hjálpar ekki liðinu

John Obi Mikel, miðjumaður Chelsea, hefur staðfest það sem menn hafa talað um lengi. Öll neikvæðnin hjá stuðningsmönnum félagsins í garð stjórans, Rafa Benitez, hefur neikvæð áhrif á leikmenn félagsins.

Stuðningsmenn félagsins hafa ekki tekið sér frídag í mótmælum sínum gegn Benitez. Þeir virðast hreinlega hata hann og bíða þess dags er hann hverfur á braut.

Mótmæli stuðningsmannanna hafa oftar en ekki verið á kostnað stuðnings við liðið og það hefur skapað sérstaka stemningu á leikjum liðsins.

"Það hjálpar ekki þegar stuðningsmennirnir eru neikvæðir. Þeir koma á völlinn til þess að horfa á fótbolta og það er okkar skylda að greiða þeim til baka. Við reynum það í öllum leikjum. Stundum tekst það og stundum ekki," sagði Nígeríumaðurinn.